Statistical Abstract of Mizoram tlangzarh

Directorate of Economics & Statistics buatsaih, Mizoram dinhmun hrang hrang tarlanna lehkhabu  ‘Statistical Abstract of Mizoram 2019’ chu nimin khan Planning Board vice chairman H Rammawia'n Planning conference hall-ah a tlangzarh.

H Rammawi chuan, data záwnga chanchin leh chhinchhiahnate chu state hmasawnna hna hrang hrang thawh nan a pawimawh tih sawiin, "Data hi hmasawnna innghahna bulpui a ni. Thil rêng rêng hi data behchhana kan tih a pawimawh zel dawn a, data mamawhna a sang telh telh ang. A dik thei berin data kan chhinchhiah a pawimawh a, hengte hi rintlak a ni ngei tur a ni," a ti.

Data-te chu a tìr aṭangin dik leh felfai taka neih a ṭul thu sawiin Rammawi chuan, "A hnua thlak emaw, siam danglam emaw hian thui tak nghawng a nei thei a, ram hmasawnna thlengin a tiṭhuanawp thei," a ti a; department hrang hrangin data an neih dante hun hmasa lama a lo inmil ṭhin loh avangin minister a nih lai pawhin harsatna a tawh thu a sawi.

Planning secretary Dr C Vanlalramsanga pawhin thu sawiin, statistics tel loin ram sum leh pai dinhmun deh chhuah, sorkar hnathawh leh hlawhtlinna leh mipui dinhmun dik tak hriat theih a ni lo tih sawiin, "Official data kimchang neih a pawimawh. Mizoram hi state naupang tê ni mah se, kum 2008 aṭang khan data kimchang tak hunbi neiin kan tichhuak thei a ni," a ti.

Statistical Abstract of Mizoram, 2019 hi Economics and Statistics buatsaih a ni a, kum khat kar danah  Statistical Handbook nen an buatsaih ṭhin. Tun ṭuma mi hi a vawi sarihna a ni a; sorkar laipui leh state sorkar inṭâwm statistics 619, state sorkar department statistics 42 leh NGO statistics 18-te dah a ni.