Inthlanpui atana inbuatsaihnaah kan inpeih tawh hle - Lalduhoma

ZPM Campaign Committee hruaitute chuan nimin khan Aizawl Press Club-ah thuthar thehdarhtute an kâwm a; Committee chairman Lalduhoma chuan, kumina MLA inthlanpui atana an inbuatsaihna sawiin, "Mihring lama inbuatsaihnaah chuan kan inpeih tawh hlein kan inhria a, tun aṭang chuan top gear-in kan tlân thei tawh ang," a ti.

Lalduhoma chuan, tun hnaiah ZPM official candidate turte an puang tih sawiin, "Kan candidate-te hi party dangte'n thlêmna tinrênga an thlêm a, an thlêm thlûk zawh lohte an ni nual a, a ṭhen chu a nuai za tél te, a ṭhen chu Rajya Sabha MP atana thlêmna tâwkte an ni," a ti a; 'Kan ei ru lo ang' tih chu an thupui lian ber leh a remchanna hmun apiangah intiam mawlh mawlh tura an inchah a nih thu a sawi.

Kumina MLA inthlanpuiah party pahnih, sum ngah tak tak an hmachhawn dawn tih sawiin Duhoma chuan, "Mihring ngaihtuahna aṭang chuan a huphurhawm hle. Tun hnaia Mizoram politics-a thil thar lawmawm tak chu, sum leh pai thil tih theihnain hna a thawk ta lo hi a ni. Serchhip by-election, LMC inthlan leh Zemabawk LC by-election-ah sum thil tih theihna tihmualphoin a awm a, mipui chungah lawmthu kan sawi a ni," a ti a, sum thil tih theihna aiin mipui chakna an hmachhuan thu a sawi a ni.

ZPM Leader chuan Manipur buaina chungchang sawiin, "Keini chuan reunification an duh chuan lawm takin kan pawm a, va inhnamhnawiha ngaihdante va siampui kan tum lo a, an thutlukna kan nghak," a ti.

ZPM Campaign Committee co-chairman K Sapdanga chuan, Law Commission of India hnenah Uniform Civil Code (UCC) an dodal thu ziakin ZPM-in an thlen tawh tih a sawi a, "Nakkumah Parliament inthlanpui a awm ang a, BJP chuan UCC hman ngei tumin hma a la leh dawn. India ram hi hnam zia leh sakhaw hrang hrang nei kan ni a, UCC hian keini Kristiante chawhhmeh thlengin a nghawng dawn a ni," a ti.

India ramah dan aiin Modi-a a lal zawk nia sawiin Sapdanga chuan, "J&K-ah kan hmu tawh a, Manipur-ah pawh. India danpui hnuaiah India mite kan him ta loin kan hria a, UCC hi pawm a nih chuan a tuar na ber tur chu tribal minority-te kan ni a, tuar na lehzual tur chu India rama missionary tír chhuak tam ber Mizote kan ni," a ti a; Law Commission-in UCC aṭangin hmarchhak state-te ngaihhnathiam tur ang deuhin rawtna a nei nia sawiin, rawtna angin NE state-te an him a nih pawhin, Mizo missionary-te an him dawn loh thu a sawi.

ZPM Working President chuan, UCC chungchangah hlauhthawn an neih thu sawiin, "Kan rama sorkar kan en hian hlauhthawn kan nei a, CAA ang deuh khan UCC hi an support leh kan hlau. UCC hnuaiah hian kan him lo tih hi ZPM dinna a ni a, Pathian leh mipui zarah sorkarna kan chang a nih chuan theihtawp chhuaha min dopui turin Mizoram mipui kan sawm a ni," a ti.

ZPM Campaign Committee Thu:

▶ Inthlan atan kan inpeih tawh hle, tun aṭang chuan top gear-in kan tlân thei tawh ang.

▶ Kan candidate-te hi party dangte'n thlêmna tinrênga an thlêm, an thlêm thlûk zawh lohte an ni.

▶ 'Kan eiru lo ang' tih hi kan thupui lian ber a ni.

▶ Law Commission-ah UCC dodal thu ziakin kan thlen tawh.

▶ UCC tuar na tur chu tribal-te kan ni, Mizoram min huam lo a nih pawhin kan missionary-te tan a hlauhawm.