NHIDCL pisaah lungawi lohna lantir
Tlabung Village Coun-cil leh Tlabung Welfare Committee, Aizawl bultumin nimin khan Lunglei leh Tlabung kawng National Highway no. 302 siam meka hnathawk-tute hmalak dan duh loin mi eng emaw zatin Tui-khuahtlanga National Highways & Infrastructure Development Corpora-tion Ltd (NHDCIL) pisa an luhchilh.
Mipui an pungkhawmte hian NHIDCL pisa bulah lungawi lohna thuziak eng emaw zat an keng a; pungkhawm zinga ṭhenkhat chuan NHDCIL pisa luhcholhin, an lungawi lohnate an hrilh a, chumi hnuah NHIDCL pisa bangah kawng chhe thlalak eng emaw zat an tár a ni.
Tlabung VC leh TWC, Aizawl chuan thuchhuah siamin, kawng chungchangah dawhthei takin an nghâk tawh mah se, an dinhmun a chhiat tial tial avangin ngawih reng chi-ah an ngai lo a, lungawi lohna an lantir ta tih an tarlang a, "Inkalpawhna kawngpui ṭha hun rei tak kan nghah leh thlir, dam khawchhuahna tura kan mamawh hmasa a nih avangin kawngpui ṭha kan neih theih nan theihtawp kan chhuah zel dawn," an ti.
Tlabung kawng chu laih zauh leh siam mek a nih avangin zawh nuam a ni thei lo tih an hriat thu sawiin, "Ngaihsak leh ngai pawimawh ni se, tun ang em em hian zawh a hrehawm loh ang a, mipuite'n tuna harsatna kan tawh ang hi kan tâwk lo ang. Kum hnih chuang ral hnu pawha tun dinhmun min thlenpuitu SRK Construction & Infrastructure Pvt.Ltd hi hna thawk zui zel tlakah kan ngai lo," an ti a, a rang thei ang bera contractor rintlak thawhtir turin NHIDCL an phût.
Tlabung VC leh TWC tarlan danin, NH-302 siam leh zauh chu package A leh B-ah ṭhen a ni a, Package A chu June 30, 2021-ah leh Package B chu July 10, 2021-ah thawh ṭan a ni. Hna thawh ṭan aṭanga kum hnih a ral hnuah pawh hna thawh tur aṭanga 17% vel bak zawh a la ni lo.
Chutih laiin, NHIDCL enkawlna hnuaia Mizorama kawng laih leh siam 21 a awm a, NH-302 tih loh chu hna thawh tur 70-90% vel zawh a ni tawh hlawm.
NH-302 laih zauh leh siam chu a muang hle tih sawiin, "Laih tawh chin pawh kháwl hmanga nawr mâmna hnûhmá emaw, lung phah hmuh tur a awm loh avangin ruah a sûr hlek chuan a diakin a nâl em em a, ni tin lirthei veivâk an tàn bakah, chetsual phah tam tak awmin nunna chàn phah hial pawh an awm," an ti a; January 25, 2022 khan Lalmalsawma, Lunglei leh July 17, 2022-ah R Lalthantluanga, Chhipphir te kawng chhia vangin an thih phah thu an tarlang.