Kolasib dist-a ram neitute'n CEP an luhchilh; Zângnadawmna pek/lak turah CEP nen inrem

Land Owners Association, Kolasib District member-te chuan July 18, Thawhlehni khan Aizawla Centre for Environment Protection (CEP) an luh chilh a, buaina chhuak erawh a awm lo. Zangnadawmna an hmuh thuai theih nan hma la turin inremna an siam a, an phût angin CEP chuan hma la tura intiamna an lo ziahsak.

CEP-in lehkha an ziahah chuan, "Vairengte-Sairang road package 3-6 te chu vawiin 18th July, 2023-a kan inremna siam angin 29th July, 2023 court date hma ngeiin affidavit thehlutin, compensation an lak theih ngei nan hma theihtawpin ka laksak ang," tih a ni a; CEP chairman AC Zonunmawia'n hming a ziah hnan.

CEP Chairman hnen aṭanga thu dawn danin, July 18, 2023-a Chief Minister hoa ṭhutkhawmah tel ve turin CEP an sawm a, mahse, agenda-ah sawi ve tur an nei loa an hriat avangin an tel lo a, an rorel pawh an hre ve lo a ni.

CM hoa ṭhutkhawma tel Land Owners Association (LOA), Kolasib District hruaitute chu 'CM-in min rawn tír phei' tiin CEP pisaah an kal tih sawiin AC Zonunmawia chuan, "Compensation chungchangah keimahni kut a nih dan ang an sawi. Compensation-ah chuan package 3 leh 4-te pawh an sem a, keini chu sawi loh, tu ma'n an dodal lo. An sem leh tur an sem ngam rih chiah si lo a, keimahniah ball an rawn béng per ta ni deuh berin kan hria," a ti.

Ram neitute chuan zangnadawmna an dawn theih nan eng emaw tal ti turin an beisei tih sawiin Zonunmawia chuan, "Ziaka min tiam loh chuan kan haw lo ang an ti a. An harsatna kan hriatthiampui a, compensation la se kan duh. Package 3 leh 4-ah pawh an sem a, tu ma'n an sawisel lo a, package 5 leh 6 pawh pawisa awm sa nia lang a ni a, sem mai se kan ti a," tiin a sawi.

CEP Chairman chuan, ram neitute'n zangnadawmna la ngei se an duhsak tih sawiin, "Keini pawhin theihtawp kan lo chhuah ang a, chutiang tur chuan kan ziak anga a ni mai lawm kan ti a. Intiamna kan lo ziah ve chu hma kan lo lâkpuina tur a nih ber e," a ti.

Vairengte-Sairang kawng siam tur leh zangnadawmna sem tur chungchangah complaint an neih loh thu sawiin AC Zonunmawia chuan, "Gauhati High Court-in Riverine Forest Reserve, 1965 a ṭhiahna kan khinna kal zel kha a ni a, High Court notification-ah khan roadside reserve a tel ve bawk nen, tikhawtlai angah min rawn mawhpuh titih deuh ta a ni," a ti a; 'An sem si lo a, case a kal si a,' an ti a nih ber thu a sawi.

AC Zonunmawia chuan, ziaka an intiamna chu ram neitute'n zangnadawmna an hmuh theihna tura an lo puih vena tur a nih thu sawiin, "Mi an mangan chuan, sorkarin a pek theih si loh chuan, a pe ngam loh nge ni, court-ah affidavit kan lo thehlut ve anga a ni mai lawm kan ti a. Thil har a ni lo a, kan main application a tibuai chuang lo," a ti.

Vairengte-Sairang kawng laih theih loha a awm reng chungchangah CEP Chairman chuan, "NHIDCL-in forest clearance an dil a, Project Screening Committee-in an en a, tih hmaih 7/8 lai an hmu. Ṭhutkhawm vawi hnihnaah chuan an zawm tur pathum vel chauh a awm tawh.

Tih turte an zawm chhoh chuan dan angin automatic-in working permit an hmu mai ang a, an ṭan nghal mawp mawp thei a ni," a ti bawk.