Kumin chhungin Sailulâk leh Léng khuaah Chinghniain sial 25 chuang a seh tawh

MJA, Serchhip district member-te chuan nimin khan Serchhip district veterinary officer Dr R Lalmakthanga hoin Sailulak leh Léng khuaa sial an vulh dan leh tun hnaia chinghnia vanga harsatna an tawhte an enfiah a; khaw pahnihah hian kuminah chinghniain sial 25-47 vel a seh tawh tih an lo hrilh.

Serchhip MJA member-te hian Léng khuaa sial vulhtu pawl, Mithun Cooperative Society Ltd. hruaitute an kâwm nghal. MCSL secretary F Rohlupuia chuan, Léng khuaah sial vulhtu mi 24-in sial 135 vel an vulh mek thu te, kum 2021 leh 2022-ah chinghniain an sial 60 chuang a seh a, sial 20 velah zangnadawmna an hmuh thu te, kumin 2023-ah chinghniain sial 13 a seh zinga 11 an thih thu a lo hrilh.

Mithun Cooperative Society hnenah hian Serchhip DVO chuan se venna atana mamawh tur bungrua leh pawisa a hlân a ni.

Sailulak Sial Vulh Association chairman Lalramthanga chuan, June 18, 2017-ah sial an vulh ṭan tih sawiin, "Sial vulh kan tam lai berin 48 an awm a, tunah hian mi 46-in an vulh mek," a ti. Kum 2020 tìr lam thlengin harsatna an tawk ngai lo a, kum 2020 tàwp lam aṭangin chinghnia vangin harsatna an tawh ṭan thu leh tunah sial 300 chuang an vulh meka an hriat thu a sawi.

SSVA Chairman sawi danin, Sailulak khuaah hian kum 2020 khan chinghnia vangin sial pariat an chán a, kum 2021-ah sial 16 leh kum 2022-ah sial 30 chuang an chán niin an hria. Kumin 2023-ah sial 12 ruang an hmuh tawh a, sial dang 20 vel awmna chin an hre lo bawk.

Sial chánte chu EFCC department-ah an thlen a, EFCC-in zangnadawmna an pe. Chutih rualin, mi pakhatin sial pathumah chiah zangnadawmna an hmuh theih thu leh sial pakhatah Rs 30,000 chauh an hmuh theih thu an sawi a, "Ramsa vanga sial kan chàn ang angah zangnadawmna hmuh theih kan duh hle," an ti.

DVO Dr R Lalmakthanga chuan, Serchhip district-ah sial vulhna khaw panga a awm thu a sawi a; tun hnaia Sailulak khuaa sial vulhtute'n shinghnia vanga harsatna an tawh chungchang chu thuneitute sang zawk hnenah an thlen zel thu sawiin, sorkar laipui thlengin an hriattir tawh thu a sawi. Chinghnia vanga sial damlo enkawlna tur damdawi leh hnatlang an neiha an hman turin pawisa a hlan a ni.

MJA, Serchhip district member-te hi an president C Lalhminghlua hoin an thawk chhuak a; C Lalhminghlua chuan, sial vulhtute'n harsatna an tawhah chanchinbumite'n ṭangkaina an nei a nih chuan an inhuam reng thu a sawi.