AR hotu-in Manipur buaina vanga ráltlánte an puih zel dawn thu a sawi

Assam Rifles inspector general (East) Maj. Gen. Vinod Kumar Nambiar chuan Mizoram a rawn tlawh mek a, July 18, Thawhlehni khan AR 23 Sector hmunpuiah Central YMA hruaitute nen an inkâwm. AR hotu chuan Manipur buaina vanga mahni in leh lo chhuahsante Assam Rifles-in an puih zel dawn thu a sawi.

Inkawmhonaah hian Mizoram kaltlanga ruihhlo tawlh ruk ṭhin do dan tur leh titawp theih dan tur te, Manipur tualchhung buaina leh buaina vanga mi tam takin harsarna an tawh chungchangte sawiho a ni.

Maj. Gen. Vinod Kumar Nambiar chuan, YMA hmalakna leh hnathawhte a hriat thu leh chhuanawm a tih thu sawiin, AR chu 'Tlang mite ṭhian' a nih angin AR-in an theihna apiangah YMA an thawhpui dawn tih CYMA hruaitute a hrilh a; Manipur buaina vanga in leh lo chán leh mahni ina awm ngam loa tlanchhiate chu AR-in an theih ang anga an ṭanpui zel dawn thu a sawi.

Manipur buai hnuah Assam Rifles-in Imphal, Manipur-a Mizo zirlai tangkhangte an chhan chhuah thu sawiin VK Nambiar chuan, "Sipaite'n ṭan bik leh duhsak bik nei loin manipur-a pawisawi lo nunaute chhanhim nan leh nunphung pangngaia an let leh theih nan hma an la reng a ni," a ti a; Manipur-a relief camp-a awmte dinhmun a sawifiah.

Maj. Gen. Vinod Kumar Nambiar chuan, tun hnaiah Mizoram chhungah ruihhlo leh ralthuamte man ṭhin a nih thu sawiin, chungte chu Mizoram state ralmuanna leh mipuia nghawng ṭha lo nei thei a nih thu a sawi a; ruihhlo leh ralthuam tawlh rûk donaah AR-te a ṭul anga thawhpui turin CYMA hruaitute a ngen a ni.