KHAWTHLIR

Mahatma Gandhi pian champha vawi 151-na pualin vawiin zing dar 8:30 hian Urban Development & Poverty Alleviation department hnuaia Swachh Bharat Mission (Urban) hmalaknain Faina Hapta (Cleanliness Week) leh Mizoram Khawpui Fai Intihsiakna (Mizoram Cleanliness Competition) 2020 hawn a ni dawn. Heng thil pahnihte hi UDPA minister Tawnluia'n a hawng ang.

ṬKP, Lawngtlai College Veng unit chuan National Voluntary Blood Donation Day pualin nimin khan thisen pek rûnpui an huaihawt a, mipa 11 leh hmeichhia palite'n thisen unit 15 an pe.

Deputy chief minister Tawnluia hoin nimin khan minister 10-te leh Lunglei HPC Vice Chairman-in September thla hlawh (basic pay) aṭangin Rs. 40,000 (50%) ṭheuh Covid-19 dona atan Chief Minister Relief Fund-ah an chhûng lut.

Higher & Technical Education (HTE) department chuan thuchhuah siamin, kum 2020-21 academic session-a Mizoram state quota-a engineering emaw, architecture emaw zir tumte chuan HTE Technical Wing-ah JEE score card September 30 aṭanga October 10, 2020 tlai dar 3 chhungin form siam sa lâk chhuaha thehluh tur a nih thu an tarlang.

State Referral Hospital-ah nimin khan Covid-19 vei mi pakhat dah luh a ni a, mi pali chhuahtir an ni thung. SRH-ZMC Bulletin tarlan danin, SRH-ah hian hripui vei vanga enkawl mi 11 an awm mek a, chu'ng zinga pathum chu ICU-ah enkawl an ni a, ngaihtuahawm an awm lo.

Ministry of Home Affairs hriattirna dungzuiin ram dang mi, an visa tàwp hnua India rama la chámte chhui leh chhinchhiah tura a tih angin, Mizoram sorkar chuan September 29, 2020 khan Task Force for Immigration Check Posts a din. Task force-ah hian police DIG (Crime) chu presiding officer a ni a, member dangte pawh ruat a ni.