CEO-in inthlan inbuatsaih dan endik

Chief electoral officer (CEO) Madhup Vyas chuan nimin khan Khawzawl a tlawh a, kumina MLA inthlanpui neih tura Khawzawl district inpuahchahnate a enfiah bakah, sorkar official-te nen an inkâwm.

Madhup Vyas chuan, inthlan tluang taka neih a nih theih nan thawhhona ṭha a pawimawh tih sawiin, "Mi dang tihsual aṭanga inzirin, an tih dan ṭha entawn a ṭul. Election Commission of India-in inkaihhruaina a siamte ṭha taka zawm leh mawhphurhna hlen kawngah inrinthulh a awm loh nan ruahmanna ṭha tak official-te'n insiam a pawimawh," a ti.

Kum 2018 MLA inthlanah Tuichâng biala vote tla chu Mizoram puma vote tla chawhrual (state average) aia a tlem thu sawiin CEO chuan, "Kumin inthlanpuiah chuan vote tla a tam theih nan uar zawka inzirtirna kalpui a, a bik takin a vawi khatna atana vote thlak tur ngaih pawimawh a ṭul," a ti a; vote thlak an tam theih nana Khawzawl district-in SVEEP plan ṭha tak an nei chu fakawm a tih thu a sawi.

CEO hian Khawzawl DC office sak mek a tlawh a, electronic voting machine dahna strong room, counting centre leh inthlanna kaihhnawiha mamawh tur hrang hranga ruahmanna kalpuite a enfiah a ni.