Congress party-in politics an sawiho

Congress party chuan nimin khan Congress Bhavan-ah politics sawihona hun an hmang a, MPCC Media department vice chairman Lalremruata Renthlei chuan, BJP-in thiam takin India ram mipui an chhimbudawi niin a sawi.

MPCC treasurer Dr Lalmalsawma Nghaka kaihruai inkhawmah hian Lalremruata Renthlei chuan, BJP-in India ram mipui an chhimbudawi nia sawiin, "New India an aupui a, hei hi Hindu lal ram din tumna a ni a, inbumna a ni. Economy policy mumal a nei lo a, reform tiin public asset an hralh vak vak a, Modi a lo lan chinah India ram economy a tlahniam char char a ni," a ti.

Lalremruata Renthlei chuan, BJP thil tum chu rem leh rem loa sorkar hrim hrim a nia sawiin, "Democracy nasa takin an pawngsual a, state tam takah ram tan hnathawk hlei thei lo khawpin sorkar lai an hawlh phel," a ti a; "Hindu lal ram din tumtute chu Mizoramah a ṭhenin kan thawhpui a, a ṭhenin thawhpui tumin an hêl a, a ṭhenin sawi fihlîm tumin fianfiah vek theih sûlhnu an nei mek," a ti bawk.