Minister-in high-mast vuahna tur a en

Minister Lalruatkima chuan nimin khan a bial, Aizawl West-II huam chhunga Kanan Veng, Vaivakawn, Dawrpui Vengthar, Dinthar, Tuikual North leh Tuikual South-ahte khawlai tihenna tur high-mast dahna tur a en.

Sorkar thuchhuah tarlan danin, Aizawl Smart City hnuaia high-mast dah tur chu ft. 30 vela sang tur a ni a, ban pakhatah solar plate pali leh electric light watt 80 pali ṭheuh dah tur a ni.

Lalruatkima chuan, Aizawl Smart City Ltd kaltlanga ni zung chakna hmang solar mini high-mast vuah tum a nih thu sawiin, "Veng chhung himna leh mawina tura ṭangkai tak tur a ni a, a ṭul dan azirin high mast pakhat aia tam pawh dah theih tura hmalak a ni," a ti. Minister hian HSLC 2023-a pakuana Esther Zorinhluzuali, Tuikual North hnenah lawmpui nan laptop a hlan nghal.

Minister hi Aizawl deputy mayor R Thanglura, AMC Ward–XIII councillor Lalfakzuala Chenkual leh Aizawl Smart City chief executive officer CC Lalchhuangkima te leh khawtlang hruaitute'n an ṭawiawm a ni.