KHAWTHLIR

Heroin man

Champhai police chuan July 18, Thawhlehni zan dar 8:05 vel khan Zokhawthar leh Aizawl inkar tlan ṭhin maxicab khalhtu Vanneihthanga (33), Zemabawk nia inchhál leh a passenger KC Thangmawii (43) leh Lalzawmpuii (39), Zokhawthar nia inchhál ve vete hnen aṭangin heroin gram 93 an man a, Champhai Police Station-ah thubuai an ziak lut.

Minister-in endik

IPR minister Lalruatkima chuan nimin khan IPR office building tihlenna, Lianchhiari Rûn (Multifacility Centre) a tlawh a, a chhung lam a endik. Sorkar thuchhuah tarlan danin, Lianchhiari Run hi sak zawh a ni tawh a, April 1, 2023 khan Union Home Minister Amit Shah-a'n a hawng.

Manipur raltlan mi 12-in an pung

Manipur buaina vanga sahimna zawnga Mizorama lut nimin tlai dar 5 khan mi 12,521 an awm a, July 18 aiin mi 12-in an pung. Mi 12,521 zinga 2,769 chu relief camp 37-ah an khawsa a, mi 9,752 chu hmun dangah an awm. Ráltlân awm tamna ber district - Kolasib-ah mi 4,428 an awm a, Aizawl district-ah mi 4,244 leh Saitual district-ah mi 2,940 an awm.

NEYCC vice chairman

Mizoram Pradesh Youth Congress Committee chuan thuchhuah siamin, nimina Bhalukpong, Arunachal Pradesh-a North East Youth Congress Coordination (NEYCC) meeting-ah MPYCC president Laltawnliana chu NEYCC vice chairman atan thlan a nih thu an tarlang.

Leitan bul min

Nimin zing khawvar hma khan Bawngkawn-Durtlang kawng chu Leitan bul lawka kawng chhak lama lei minin a hnawh ping a, nimin tlai dar 6:30 pelh khan lirthei kaltlang theiha tihtlang a ni. Vawiinah thenfai chhunzawm a nih dawn avangin chhun dar 11 leh chawhnu dar 3:30 inkarah kawng khâr leh a ni ang.

Speaker-in tlangzarh

PC Lawmkunga, IAS (Rtd.) lehkhabu ziah, 'Sapṭawng zir dan awlsam' tih chu nimin khan Assembly speaker Lalrinliana Sailo-in a pisaah a tlangzarh.