Zo hnahthlakte thlavâng hauh nan kawngzawh & punkhawm huaihawt dawn

Manipur buaina kaih­hnawiha Zo hnahthlakte tawrhna avangin NGO Coor­dination Committee chuan July 25, 2023 (Thawhlehni) khian Mizoram pumah kawngzawh an huaihawt dawn. Congress party-in kawngzawh huaihawt an tum bakah, MZP-in Lammualah punkhawm huaihawt an tum bawk.

Tlawmngai pawl panga intêlkhawmna NGO Coordination Committee hruaitute nimina Central YMA Committee Room-a ṭhukhawm chuan, Manipur-a Zo hnahthlakte harsatna tawh mek hriatpuina leh tawrhpui nan July 25, 2023 chawhma dar 11-ah Mizoram pumah 'Zo hnahthlak unaute thlavâng hauhna kawngzawh' huaihawt an rêl.

Kawngzawhah hian Mizo mipuite thawk chhuak ṭheuh turin Joint NGO chuan an sáwm a, sorkar hnathawk, zirlai, sumdawng leh lirtheia eizawngte pawh an hna ṭulte kalsana tel vek tura an ngen bakah, kawngzawh ní-ah mahni in ṭheuhah puan dum zár turin mi tin an ngen.

Joint NGO chuan, Mizorama Meitei awmte chu an sahimna atan fimkhur turin an chah bawk.

MPCC Action Committee pawhin July 27, 2023 (Ningani)-ah Aizawla Chanmari kâwn aṭanga Tennis Court thlengin 'Sakhaw zalenna humhalhna leh Zo hnahthlak unaute thlavâng hauhna kawngzawh' huaihawt an tum a, tel turin mi zawng zawng an sáwm.

MPCC chuan, Manipur-ah Kristiante biak-in tam tak hâl a ni tawh a, mi tam tak an thi tawh tih an tarlang a, "Kan unau hmeichhe áwm ném zawkte pawngsuala saruaka kawngzawhpui an ni hi a ná kan ti tak zet," an ti.

MZP General Headquarters hruaitute nimina ṭhukhawm pawhin Manipur Zo hnahthlakte thlavâng hauh nan August 3, 2023 khian Lammualah ‘Peaceful demonstation’ huaihawt an rêl.

MZP chuan, Manipur tual­chhung buaina avanga Zo fate thlavâng hauhtu mi eng emaw zatte dikna leh zalenna rahbehsak an ni tih tarlangin, "Case rip tak Manipur CM Biren Singh-a’n a siamsak hi kan dem hle a, an case tihtawp a nih theih nan MZP-in ṭanpui ni se tiin kan rêl," an ti.

MZP chuan, May 4, 2023-a thil thleng video tun hnaia social media-a darh, Meitei hoin Zo hnahthlak hmeichhe pawisawi lo pahnih pawngsual a, saruaka kawng an zawhpui chu runthlak an tih thu an tarlang bawk.