Manipur buaina chingfel thuai turin CM-in PM leh Manipur CM a phût

Chief minister Zoramthanga chuan, Manipur chief minister N Biren Singh leh prime minister Narendra Modi te chu a rang thei ang bera Manipur buaina chingfel tura hma la tur leh pawikhawihtute dan hmaa rorelsak thuai turin a phût a, "Ngawih chuh hun a ni ta lo e," a ti.

CM Zoramthanga chuan, "Manipur chief minister Pu N Biren Singh leh prime minister Pu Narendra Modi te a rang thei ang bera hmalakna nei nghal tur leh pawikhawihtute man chhuak a, dan hmaa rorelsak thuai turin ka phût a ni," tiin nimin khan social media - Instagram leh Twitter-ah a tarlang a, Twitter-ah hian Narendra Modi leh N Biren Singh te a mention a ni.

Chief Minister chuan, Manipur buaina chinfel dan kawng awm apiang dapin a rang thei ang bera ngaihtuah a ngai tih tarlangin, "Remna leh muanna a lo awm leh thuai a, nunphung pangngai an zawh leh theihna tura kawng zawn nghal ni se ka duh ber a. Chu chu mawhphurhna la ngei ngei tura ngaihte mawhphurhna, Manipur sorkar leh sorkar laipuite tihmâkmawh pawh a ni a; a rang thei ang bera remna leh muanna kawng zawn hi an koa innghat tlat a ni," a ti.

Manipur-a râwng taka tharum thawhnain ṭhenawm ramte chauh ni loin, India ram pum a nghawng chhuak tih sawiin Zoramthanga chuan, Manipur-a Vaiphei hmeichhiate chunga nunràwnna lantirna video darh chuan amah a déng na hle tih a tarlang a, "Video-a kan hmuh zahmawh thila inbeihna hi zahngaihna tel lo nunrâwng taka chêtna uchuak, zahthlak tàwpkhâwk leh mihring chunga nunràwnna lantirna demawm tàwp a ni," a ti a; Manipur buaina chinfel leh tihtawp hlen dan ngaihtuah theitu chu sorkar laipui chauh a nih thu a sawi.

CM Zoramthanga chuan, "Manipur buainaah hian mi tam takin nunna an chán tawh a, thisen tam tak a luang ral tawh a, hliam leh sahimna zawnga hmun dang pan mi tam tak an awm belh zel bawk. Chu'ng zingah chuan ka chipui Zo hnahthlak tam tak an tel a, kan chipuite tawrhna chu kan tawrhna a nih miau avangin ngawihsan theih a ni lo," a ti bawk.

Minister of state Robert Romawia Royte pawhin Manipur buaina chuan zual lam a pan zel thu leh, ṭhenawm state-te chauh ni loin, India ram pum a nghawng tawh thu social media-ah a tarlang a, "Vaiphei hmeichhe pahnih zahngaihna tel lo leh râwng taka sawisak video darh hian min barakhaih hle a, nunrawnna tàwp a ni," a ti a, Manipur buaina chu tihtawp thuai a ṭul thu leh chingfel theitu chu sorkar laipui chauh a nih thu a tarlang. Robert Romawia hian a post-ah hian Narendra Modi leh N Biren Singh a mention nghal bawk.