Sports department-in nuai 45,000 an thawk chhuak - MNF

MNF Media & Publicity department hruaitute chuan nimin khan Aizawl Press Club-ah thuthar thehdarhtute an kâwm a; Sports & Youth Services department-in kum li chhungin Mizoram budget páwn aṭangin cheng nuai 45,000 chuang a thawh chhuah thu leh SYS Minister chêt ṭhat dan chu eptute thîk tham a nih thu an sawi.

MNF general secretary VL Krosshnehzova chuan, SYS department-in Annual Plan-ah cheng nuai 2,600 vel an neih laiin cheng nuai 45,000 chuang a thawk chhuak niin a sawi a, "Asset hlu tak tak a siam bakah GST leh labour cess aṭangin sum tam tak sorkarah a chhûng lût. Sports Minister hi a chet ṭhat êm avangin opposition tan chuan thîk tham a ni," a ti.

SYS minister Robert Romawia chu thu belhchian dâwl lo leh rinthu nen beih a ni ṭhin nia sawiin Krosshnehzova chuan, "Assembly House-ah pawh Pu Lalduhoma, ZPM MLA chuan mipui hriatah ngaihdam hial a dil a ngaih phah. A mimalah thlûr bingin Office of Profit hmanga bei lehin, rin thu nasa takin an bâwl phuan a, a bàn hialte an phût a ni," a ti a, eptute'n an beihna chu belhchian dâwl lo a nihna a lang zel niin a sawi.

MNF TARLAN ṬHENKHAT

▶ SYS Minister chak, a chan department-te hneh taka enkawl ṭhin, a hmalakna zarzo duh vea bial tin deuh thawin an auh rawn tlak kan nei hi kan chhuang.

▶ MNF sorkar aṭanga kum khat ral hmain Mizoram State Sports Policy 2019 peih a ni.

▶ Group-B non–gazetted hnuai lam hna ngheta laknaah sport thiam bikte tan 5% hauh a ni.

▶ Residential sports school panga din nan PMJVK aṭangin nuai 16,751.70 ruahman a ni.

▶ Phûl lem phahna tur hmun 30 zinga 21 chu SYS hmalaknaa thawh a ni a, 14 zawh tawh niin pasarih thawh mek a ni.

▶ SYS-in cheng nuai 282.8 séngin hostel pali an sa mek.

▶ Basketball leh volleyball court 100 chuang siam nan state budget páwn aṭangin cheng nuai 3,700 chuang an thawk chhuak.