A tàwp thlengin Zo hnahthlakte thlavâng kan hauh dawn - MNF party
MNF party chuan thuchhuah siamin, Manipur-a pawisawi lo Mizo hmeichhe pahnih chunga râwng taka Meitei ho chêt dan chu pài dam chi-a an ngaih loh thu leh a tàwp thlenga Zo hnahthlakte thlavâng an hauh dawn thu an tarlang.
MNF chuan, Manipur-ah Meitei hoin Mizo hmeichhe pahnih chu saruaka kawng zawhpuiin, an pawngsual rawn a, sawisain an tihlum tih an tarlang a, "Tunlai khawvel hmasawn tawh karah hmànlai rilru, ramsa ang maia insawisakna a thleng hi a mak kan tiin a ná kan ti a, a tàwp thlengin kan unaute thlavâng hauh nan hian MNF chu kan pen dawn a ni," an ti.
Mizo hmeichhe pahnih chunga thil thleng chu an dem tak zet thu sawiin MNF chuan, "Mawhphurtu chhui chhuah leh hrem kawngah Manipur sorkar, N Biren Singha kaihhruai leh central sorkar chu chak taka hma la a, an tih tur ti nghal turin kan ngenin kan hriattir nghal," an ti a; Manipur sorkar leh sorkar laipuiin an tih tur an ti thei lo a nih chuan Mizo hmeichhiate thisenin a auhna chháng turin hmalak nghal an inpeih thu an sawi.
MNF party chuan, Manipur buainaah tun thlenga hmalakna mumal a la awm lo chuan mimal zalenna humhim tura Manipur sorkar hlawhchham zia leh hleih nei taka ro an rêlzia a ti lang chiang tih sawiin, "Central sorkar chu a tih tur ti a, mihring zalenna hum tura che nghal turin na takin kan kar nghal bawk," an ti.
Kristiante biak-in hâl ral a, nunau pawisawi lote nen lam chunga Meitei mipui râwvâ taka chêttirtu N Biren Singh chu a mawhphurhna hre lo, India dan palzût a, hnambil politics, dictator taka kalpui mekah an ngaih thu MNF chuan an tarlang bawk.