Finance Commission-in report an thehlut
Mizoram Finance Commission pahnihna hotute chuan nimin khan Governor Dr Hari Babu Kambhampati hnenah State Finance Commission report an thehlut. Report hi Governor-in Finance department hnenah zir chian turin a thawn leh ang.
Sorkar thuchhuah tarlan danin, 2nd State Finance Commission report hian kum 2021-22 aṭanga 2025-26 financial year chhung a huam a, kum khat leh thla 10 chhung zirchianna an kalpui hnuah bung 11-a ṭhen, phek 549-a chhah report chu Commission chairman F Vanlalruata leh secretary Lalmalsawma ten Governor hnenah an thehlut a ni.
Report-ah hian Mizoram sorkarin chhiah chi hrang hrang a lak aṭanga tualchhung sorkar - village council, municipal corporation/council leh autonomous district council te chan tur zat bituk te, state sorkar sum tualchhung sorkarte hnena grants-in-aid pek dan tur leh tualchhung sorkarte sum dinhmun siamṭhatna tur chungchangte a tel.
Finance Commission report hi Governor-in Finance department-ah a thawn ang a, state sorkarin a zir chiana a pawm hnuah bawhzui dan (action taken report) chu Indian Constitution-in a phût angin Legislative Assembly-ah la pharh leh tur a ni.
State Finance Commission report hi pawm a nih hunah chuan tualchhung sorkarte’n state sorkar aṭanga kum tina sum an dawn dan tur an hre tawh ang a, tualchhung inrêlbâwlna mumal zawkin an kalpui thei dawn niin sorkar thuchhuah chuan a tarlang.