‘Namaste Trump’ neih a ni leh dawn em tih Chidambaram-a’n a zawt

Congress hruaitu hlun P Chidambaram chuan US President Donald Trump-a'n India Covid-19 tally  a rintlak tawk lo nia a sawi hnuah, prime minister Narendra Modi chu ti elin, a ṭhianṭha tak Trump pualin 'Namaste Trump' rally a huaihawt leh dawn em tih a zawt. 

President Trump hian Nilaini zinga presidential debate an neiha coronavirus leng chungchanga a hmalak dan a chhannaah, he hri leng vanga India, China leh Russia rama thi zat dik tak chu hriat a ni lo a, heng ramte hian a number dik tak an tarlang lo a ni, a ti. Hei bakah hian India chu boruak tibawlhhlawh zualtu ram zingah a sawi tel bawk. 

Hemi chungchang hi Chidambaram chuan a twitter-ah rawn sawi chhuakin, "Donald Trump chuan India, China leh Russia chu hri leng vanga thi zat zepah a puh a, air pollution siamtu nasa berah a puh bawk. 

Hetichung hian Modi chuan a ṭhianṭha tak chawimawina atan hian 'Namaste Trump' rally chu huaihawt a la tum cheu dawn em?" tiin Prime Minister chu a zawt a ni.