MPCC-in dâwt sawiah Duhoma an puh

Mizoram Pradesh Congress Committee (MPCC) chuan, ZPM leader Lalduhoma'n July 19, Nilainia Aizawl Press Club-a thuthar thehdarhtute a kawmnaah, ZPM candidate tur zinga tute emaw chu Congress party-in cheng nuai 100-in an thlêm nia a sawi chu thu dik lo a sawi tawh laka mi rilru lâk pên tumnaah an puh.

MPCC chuan thuchhuah siamin, "Pu Lalduhoma'n ZPM candidate tur Congress-in cheng nuai 100-in an thlêm nia a sawi hi Guwahati a zin chungchanga a dâwt sawi Mizoram mipui rilru lak pên leh phat mar tuma tâlbuaiin dâwt dang a sawi lehna mai a ni," an ti.

Lalduhoma chu thil chiang fak hre lo a nih ṭhin nia sawiin, Assembly House-ah pawh thuk dik lo a sawi avangin ngaihdam a dil tawh tih MPCC chuan an sawi a; Lalduhoma'n cheng nuai 100 chungchang a hriat chu Assembly speaker Lalrinliana Sailo USA-a zinin MNF sorkara cheng nuai 100 chungchang ziah bo awm a sawi nen a hriat pawlh em ni, tih chu an zawhna a nih thu an tarlang.

Congress party chuan, Zalen chanchinbu hnenah July 18, 2023 khan BJP Minority Morcha secretary Delson Notlia-in Lalduhoma nen hmaichhanah ṭum khat chauh an la inhmu a, airport-ah an inhmu tih a sawi laiin, Lalduhoma chuan Delson nen an la inhmuh loh thu a sawi thung niin an tarlang a, "An party mipui hmaah dâwt a sawi duh hian chhungkaw pa ber atana rintlak a nih lohzia a tifiah chiang hle," an ti.

MPCC chuan, "MNF sorkar hi NDA leh NEDA-a an thawhpui BJP-in sorkar leh tura an rin loh avangin an sum hmanga Congress party do thei tur tualṭo party dang an zawng tih hi Mizoram mipui rin dan a ni," tiin, ZPM-a mi ṭhenkhatin BJP a rûka dawr chungchangah inpuhmawhna a awm niin an tarlang a; an president Lalsawta chu Mizoram mamawh niin an sawi bawk.