Mizoram AAP-in hriatthiam har an ti

Aam Aadmi Party (AAP), Mizoram hruaitute chuan nimin khan Aizawl Press Club-ah thuthar thehdarhtute an kâwm a; BJP kaihhruaina ṭhutkhawma MNF party an tel ve chu hriatthiam har an tih thu an sawi a; MLA inthlanah candidate a tam thei ang ber neih an tum thu leh Aizawla MLA bial 11 chu chuh vek an tum thu an sawi bawk.

AAP Mizoram president Andrew Lalremkima Pachuau chuan, tun hnaia Manipur-a buaina chhuah chhan chu BJP an nih thu a sawi a, "Tunah pawh hian Mizoramah BJP chuan hnam hnufuala an ngaihah thapui an thawh mek a, hei hi nakin lawka Mizoram tana la pawi thei a ni a, Mizo mipuiin BJP kan hnawl a ngai," a ti.

Manipur-ah Kristianna nêk chêp mek an nih thu leh Zo hnahthlakte'n nasa taka an tawrh thu sawiin AAP President chuan, "Ram hmangaih tak taka kan ngaih kan ram hruaitu MNF-te BJP kaihhruai meeting-a an tel ve hi hriatthiam har kan ti hle," a ti a; Mizorama political party, BJP nena inzawmna neite chu inhnûkdâwk vek turin an ngen tih a sawi.