Home Minister-in 3rd IR hmun a tlawh; ruihhlo laka inthiar fihlim turin a chah

Home minister Lalchamliana chuan July 19, Nilaini khan Thingkah, Lawngtlai district-a 3rd Indian Reserve (Mizo) Battalion Headquarters a tlawh a, battalion hotute nen an inkâwm a; ruihhlo laka inthiar fihlim turin police-te a chah.

HM Lalchamliana hi Finance secretary Vanlalchhuanga, IGP (Headquarters) John Neihlaia, commissioner of taxes R Zosiamliana, Lai Autonomous District Council-a MDC K Hre Kung, Lawngtlai SP Lokeshwaran R leh official dangte'n an ṭawiawm a; 3rd IR deputy commandant Jacob Hlychho leh a thawhpuite'n an lo dawngsawng.

Lalchamliana chuan, "Mihring nunah thuawihna, discipline a pawimawh hle a, min khuahkhirha min thununtu an awm lohnaah mahni inthununna a pawimawh lehzual," a ti a; ruihhlo chu fahrah leh hmeithai tam tak siamtu leh ṭhalaite nun tichhetu a nih thu sawiin, ruihhlo laka inthiar fihlim turin police-te a chah a ni.

MNF sorkarah uniform, silai leh mamawh dangteah a ṭha thei ang bera police-te thuam tura hmalak a nih thu sawiin Chama chuan, "Police thawktu indaih lohna nasa tak phuhru tura hna lak tum a nih mek laia Mizoramin Covid-19 leh harsatna dang dang a hmachhawn avanga hna lak theih a ni ta lo hi a pawi hle mai a, sum harsatna karah sorkar chuan theihtawp chhuahin police-te mamawh ngaihtuah zel a tum a ni," a ti.

Home Minister chuan, 3rd IR-te chu police battalion ṭha tak tia a hriat an nih thu leh Assam-a an awm lai pawhin Mizote tihmingṭhatu an nih thu a sawi a; an battalion hmingṭhatna chu chhawm nung zel turin a fuih.

Inkhawmah hian Finance Secretary leh IGP (Headquarters) te pawhin thu an sawi a; 3rd IR Deputy Commandant kaihhruaiin 3rd IR hmunhmate an fang kual a ni.

3rd Mizo IR hi May 12, 2008-ah din a ni a, kum 13 chuang, January 28, 2010 aṭanga March 28, 2023 thleng Assam-ah an awm. Assam-a an awm laiin an awmna chhehvela mi harsate hnenah cheng vbc. 1.70 chuang hû ṭanpuina an pe chhuak a ni. Thingkaha 3rd IR headquarters hmun hi April 12, 2023 khan an luah ṭan a, Lawngtlai district leh Siaha district chu an mawhphurhna huam chin (area of responsibility) a ni.