KHAWTHLIR

Thisen pe

J Buana College NSS leh Red Ribbon Club chuan nimin khan an college-ah thisen pek an huaihawt a, Lunglei Civil Hospital tan thisen unit 130 an pe a, petute mipa 84 leh hmeichhia 46 an ni. Mizoram UPC Kolasib Bial PYD pawhin Kolasib District Hospital tan thisen unit 24 an pe a, petute mipa leh hmeichhia 12 ve ve an ni.

Meitei-te chhuak lo turin chah nawn

ZORO chuan thuchhuah siamin, Manipur-a Zo hnahthlak hmeichhia pahnih, saruaka mipui hmaa kaltir video tun hnaia darh chu thinrimthlak an tih thu an tarlang a, "He thil hian Zo fa hmun tinah a tithinrim a, thil duhawm lo a thlen loh nan Mizorama Meitei awmte fimkhur a, boruak a ziaawm hma chu páwna chhuak lo turin kan chah nawn leh a ni," an ti.

Volleyball Court

Sports minister Robert Romawia Royte chuan nimin khan Chuhvel khuaah volleyball court a hawng a; Myanmar aṭanga dan loa kuhva lut chu nasa lehzuala endik turin sorkarin hma a la mek niin a sawi. Volleyball court hi Junior Consultancy Services-in PMJVK 2020-21 aṭanga hmuh cheng nuai 31.20 sênga an siam a ni a, sum sèn zinga 90% chu sorkar laipui tum a ni.

Lungphum phum

Home minister Lalchamliana chuan nimin khan UDPA department kaltlanga Thosai khelmuala phûllem phah tur lungphùm a phúm. Lalchamliana chuan, UDPA kaltangin phûllem pariat leh Sports department hnuaiah phûllem 20 chuang phah a nih tawh thu a sawi. Thosai khelmualah hian SEDP sum nuai 395.53 sêngin phullem phah a ni dawn a, contractor chu Gallan Sports & Infra niin, kuminah phah zawh tum a ni.

Health check-up

AMRI Hospitals, Kolkata chuan nimin khan Aizawl traffic police-te tan Aizawl Traffic Station-ah Free Health Check-up cum Awareness on Health and Wellbeing an buatsaih a, IGP Lalbiakthanga Khiangte-in a hmanpui. He hunah hian AMRI Hospital-a doctor-te'n hepatitis B leh C screening an neihpui a, chawhnu lamah gastroenterologist Dr Sanjay Basu chu ràwn theihin a ṭhu a ni.

Methamphetamine

Assam Rifles leh Zokhawthar police-te chuan July 19, Nilaini khan Zokhawthar leh Melbuk inkarah Jaynal Uddin (27) leh Fayzul Hague (28), Kakuripar, Karimganj ve ve nia inchhálte hnen aṭangin methamphetamine mûm 20,000 an man. Meth man hi Rs 6,00,00,000 hû a ni.

Graduation day

Johnson College chuan nimin khan Electric Veng YMA Hall-ah Graduation-cum-Freshers' Social programme an hmang a, Minister C Lalrinsanga'n hmanpuiin, "Mizoram ti-Mizoramtu chu a chhunga chengte hi kan ni a, ram hmangaihna rilru nen chuan hmasawnna pawh a ngêlnghet," a ti. Johnson College-ah hian zirlai 945 vel an awm mek
a ni.

Chhanchhuahna

Phunchawng leh Rangvamuala awmte tana eizawnna tluantling ngaihtuahtu Core Committee: Mission Chhanchhuahna chu nimin khan Aizawl DC Dr Lalhriatzuali Ralte kaihhruaiin Rangvamual Local Council House-ah an ṭhukhawm. Rangvamual leh Phunchawng LC, YMA leh kohhran hruaitute'n harsatna leh mamawh an thlentea hmalak dan tur sawiho a ni.