Assam Rifles-in Aizawlah NEET/JEE coaching centre din dawn

Assam Rifles inspector general (East) Maj.Gen. Vinod Kumar Nambiar chuan, Assam Rifles-in Mizo ṭhalaite tan medical leh engineering entrance hmachhawn tura inzirna, coaching centre an din dawn thu a sawi.

IGAR (East) Maj.Gen. VK Nambiar hian nimin khan AR 23 Sector Headquarters conference room-ah thuthar thehdarhtu ṭhenkhatte thingpui a inpui a; Mizo ṭhalaite zingah kawng hrang hranga theihna (talent) nei ṭha tak tak an tam tih an hriat thu sawiin, "Mahnia inpho chhuak thei lote ṭanpui kan duh. Assam Rifles chuan Aizawlah medical leh engineering entrance exam inbuatsaihna leh inzirna atan Super 30 kan din dawn a, zirlai khawsak harsa, thiam site tana buatsaih tur a ni," a ti.

Assam Rifles hotute sawi danin, medical entrance test NEET leh engineering entrance test JEE atana inbuatsaihna tur coaching centre Aizawla din an tum chu September 2023-ah ṭan hman tum a ni a; JEE leh NEET atan hian zirlai thiam thei, khawsak harsa site aṭangin mi 30 lak tum niin, senso zawng zawng AR-in an tumsak dawn. Coaching kalpui dan tur kimchang chu chawlhkar khat ral hnuah chiang zawka an puanzar theih an beisei.

Journalist-te nena inkawmhonaah hian Maj.Gen. VK Nambiar hi Assam Rifles 23 Sector commander Brig. Girish Upadhya leh PRO Lt.Col. Swati Negi ten an ṭawiawm a; Mizorama AR-te hmalakna leh hnathawh hrang hrang te, ruihhlo leh ralthuam tawlh rûk chungchang te, ram dang aṭanga dan loa thil lak luh chungchangte an sawiho a ni.

Maj.Gen. VK Nambiar hian nimin khan Raj Bhavan-ah Governor Dr Hari Babu Kambhampati a kâwm a, ram venhimna chungchang, Mizorama AR-te hnathawh dan leh thil pawimawh dangte an sawi dun a ni.

AR Inspector General hian nimin vêk khan chairman a nihna Sainik School, Chhingchhip a tlawh a, principal Wg. Cdr Shahul Hameed-a'n a lo dawngsawng. Tun hnaia India ram puma Sainik School-te football-a inelnaah Sainik School, Chhingchhip an champion avangin lawmpuina a hlan a, physics leh chemistry laboratory thar a hawng bawk. Sainik School, Chhingchhipah hian zirlai 387 awm mekin, mipa 341 leh hmeichhia 46 an ni a, an zinga mi 67 chu Mizoram mi an ni.