NH-302 kawng chhia chungchangah Tlabung VC-te'n Governor an hmu

Tlabung Village Council hotute chuan nimin khan Raj Bhavan-ah Governor Hari Babu Kambhampati an hmu a, National Highway 302 Lunglei-Tlabung kawng chhe lutuk leh kawng siam muang lutuk chu ngaih pawimawhsaka hma la turin an ngen.

Tlabung VC-te chuan, Lunglei-Tlabung kawng siamnaah a nih dan tur anga hna thawh a ni lo a, lung sakhat phah a nih ngai loh thu te, ni tin deuhthaw zankhuaa lirthei táng a la awm reng thu te, kawng siamtute'n hna an thawh muan thu te, Mizoram hmun dangah kawng siam turah hna 70-90% vel zawh a nih tawh laiin NH-302 ah chuan 17% vel chiah zawh a la nih thute Governor an hrilh.

Hmun hnufual zawka chêngte dâwm kànna tur Pradhan Mantri Jan Vikas Karyakram (PMJVK) chu Tlabung leh a chhehvel khuate'n an chhawr phak loh thu sawiin, PMJVK chu a nih ang taka kalpui a nih a, Tlabung leh a chhehvela mite'n an chhawr ve theih nan hma laksak turin Larsap an ngen a; hriselna, zirna leh infiamnaah ngaihsak bik ngai an la nih thu an sawi bawk.

Dr Hari Babu Kambhampati chuan, Tlabung khawtlang hruaitute thil thlen chu a ngaih pawimawh thu sawiin, a ṭul anga lo en zui ngei a tum thu a sawi a; hun remchang hmasa berah Tlabung tlawh ngei a tum thu a hrilh.