Manipur buaina Parliament-a sawiho dilna Vena'n a thehlut

Parliament monsoon session-ah Manipur-a chi leh chi inkara buaina chungchang sawiho dilna Mizoram Rajya Sabha MP K Vanlalvena'n nimin khan Rajya Sabha Chairman hnenah a thehlut.

K Vanlalvena hian July 20, Ningania ṭan Parliament session-ah Manipur buaina chungchang July 24, 2023 (Thawhṭanni)-a sawiho dilna dan tlawhchhanin Rajya Sabha chairman Jagdeep Dhankar hnenah ziakin a thlen a ni.

Rajya Sabha MP chuan a lehkhaah, Manipur buaina avangin mi 140 aia tam an thih tawh thu leh hliam tam tak an awm thu te, ráltlân mi 50,000 chuang an awm thu te, chenna in 5,000 chuang leh biak-in 300 chuang tihchhiat leh hâl a nih tawh thu te, Zo hnahthlak hmeichhia leh naupangte pawngsual leh nghaisak an nih thute a ziak.

Parliament session-ah hian eptu MP eng emaw zatin Manipur buaina sawiho an phût avangin July 20-a session ṭan ní aṭangin Parliament House rorel an tibuai a, rorel mumal awm loin a ni khatna tihtawp a nih bakah, niminah pawh rorel theih a ni lo.