AAP leh BJP mi leh sate an innawr

Manipur buainaa Zo hnahthlakte chunga thil thleng demna leh BJP kaihhruai sorkar chêt dan demna lantir nan Aam Aadmi Party (AAP) mi leh sate chuan nimin chawhma dar 10:30 vel khan BJP, Mizoram Pardesh pisa, Upper Republic-ah punkhawm, sit-in demonstration neih an tum a, BJP party mite nen an innawr buai.

Mizoram AAP lakah hian Mizoram BJP hruaitute chuan nimin vek khan Aizawl SP hnenah first information report (FIR) an thehlut a; AAP-te chuan punkhawm phalna leh aurinna hman phalna an lak loh thu te, lirthei tlân vel an danchah thute an tarlang.

AAP hruaitute chuan, BJP pisaa bula punkhawm an tum chu Manipur-a tharum thawhna thlengah BJP, Mizoram chu tun aia nasain au chhuak se an tih vanga huaihawt an nih thu an sawi a; BJP mi leh sate'n state danga BJP-te tih ṭhin angin tharum hmangin an lo chháng lêt tih an sawi a ni.

Manipur buaina chu BJP nena inkungkaih a nih thu sawiin AAP hruaitute chuan, "Prime Minister a ngawih reng vang a ni a, PM Modi-a a ngawi reng hian chhan lian tak a neih ngei a rinawm a, sakhaw tenau zawk leh hnam hnufual zawkte min nuaibo tumna a ang hle a ni," an ti.

AAP hmalakna chungchangah hian BJP, Mizoram Pradesh president Vanlalhmuaka chuan, Mizorama AAP-te chu Mizo hnam nun ze mawi tichhe lo tur leh tidal zawnga che lo tur te, vai tih dan ṭha lo hmanga mipui fuihpawrh lo tur te, mi pisa tuala buaina cho chhuak zawnga nawrh chíng lo tur leh Kristian taka AAP thiam turin a chah.

BJP President chuan, AAP chêt dan chu Mizo nun ze mawi tihchhiat tumnaah puhin, "Mizo Kristian chhûl chhuak chuan hetiang thil kan hnam tana pawi thei hi kan hre tur a ni. Keini pawh kan hotute chu vai an ni a, ti tura min tih ang zawng zawng kan ti ngai lo. Mizoram AAP-te hian hetiang thilah chuan min ráwn ṭhin se tih kan chah duh a ni," a ti.