FB-a thu post-tu leh group siamtu chhuia action la turin police ngen

Facebook group pakhata thu post leh ZPM hruaitu hming hmanga group siam chungchangah ZPM Media, IT & Publicity department hruaitute chuan nimin khan Mizoram Police-a Cyber Crime hotute an kâwm a; thu post-tu leh group siamtu chhui chhuak a, dan anga action la turin an ngen.

ZPM thuchhuah tarlan danin, Facebook-a Lalbiaktluanga Juda intiin ZPM mi leh sa ni àwm takin, 'Republic Veng ho khan lo hre rawh u, ZPM hi min ngam chuang lovang. Eng ang paw’n emergency meeting pawh lo nei mah u la, nangni veng mipui aiin ZPM hi kan tam fe zawk,' tiin Zoram Politics Group II-ah a post a; Zoram Parteii intiin ZPM working president K Sapdanga hming langin 'K Sapdanga Support Group' tih a siam bawk.

Lalbiaktluanga Juda inti thu post leh Zoram Parteii intiin group a siamte chu ZPM tihmualpho tumna ni ngeiah an ngai tih tarlangin ZPM chuan, "Tun hnuah hetiang lemchanna thil hi a thlen tawh lohna turin Cyber Crime hotute hnenah lo en zui a, a ṭul anga action laksak turin kan ngen a ni," an ti.

ZPM chuan, Lalbiaktluanga Juda inti thu post chu an ngaih thutak thu tarlangin, Lalbiaktluanga Juda chu an hriat ngai a nih loh thu leh a thu post tawh ṭhin dan enin ZPM supporter a ni lo tih a lan chian thu an tarlang a; Zoram Parteii inti pawh thu a post tawh ṭhin dan enin, ZPM supporter a ni lo tih a lan chian thu leh 'K Sapdanga Support Group' tih group a siam chu ZPM working president K Sapdanga tihmualpho tumna ni ngeia an ngaih thu an tarlang bawk.

Tunlaiin social media-ah ZPM party tihmualphona turin ZPM lemchang an tam thu tarlangin, chutiang tih chíngte laka fimkhur turin ZPM chuan mipui an chah a ni.