MNF SEDP hi hmangaihna tel loa ngaihzawng neih ang a ni - Lalsawta

Mizoram Pradesh Congress Committee (MPCC) president Lalsawta chuan, NDA-a thawk dun BJP leh MNF-in ram hmasawnna tur an sawiho ngai lo a, sum chiah an sawiho ṭhin niin a sawi a; Socio Economic Development Programme (SEDP) chu hmangaihna tel loa ngaihzawng neih ang niin a sawi bawk.

Lalsawta hian nimina Congress Bhavan-a political session-ah thu sawiin, "India ram roreltu BJP leh MNF hian kawng ṭha te, ram enkawl dan tur ṭha te, ei leh bar zawnnaa hmasawnna turte an sawi ngai lo a, pawisa chiah an sawi ṭhin. Mizoramah pawh MADC leh CADC-ahte chuan pawisa chaknain mipui thlan rorelna an namthlu zel," a ti.

Kumin October thlaah Election Commission of India-in Mizoram inthlan hun a puang dawn nia sawiin Lalsawta chuan, "Hemi atan hian MNF-in SEDP an vauchher a, hmangaihna tel loa ngaihzawng neih ang a ni. Candidate chang loin MNF MLA ni lai tam tak chhawkin an awm dawn," a ti a, October thla aṭangin MNF chim rûnpui a thleng dawn niin a sawi.

Congress President chuan, Manipur mipuiin nasa takin BJP rorelna an tuar nia sawiin, "BJP nih te, BJP fakte a tiha kan tih ngai loh kha hman ní lawk a ni. Tunah chuan BJP sum ît vangin mi pangngai tak takte pawhin BJP fakna an chhâk chhuak ngam ta hi thil rapthlak a ni," a ti bawk.