PUC-in zirlai tiṭhate an chawimawi

Pachhunga University College chuan nimin khan an hmunah zirlai thar lawmna leh zirlai tiṭhate chawimawina, Freshers’ Social & Felicitation an hmang a, Governor Dr Hari Babu Kambhampati khuallian a ni. Zirlai tiṭhate hnenah chawimawina an hlan.

Governor Hari Babu Kambhampati chuan, New Education Policy, 2020-in zirlaite hmasawnna atana kut themthiamna tihhmasawn leh kutkawih eizawnna lam uar tura zirna kalphung thar a siam chu hmang ṭangkai tur leh, English an thiamna hmang ṭangkai a, India ram chhung leh páwna hna zawng ngam turin zirlaite a chah.

Inkhawmah hian Mizoram University under graduate examination 2023-a stream hrang hranga tiṭha berte leh department hrang hranga top 10-a langte hnenah chawimawina hlan a ni. PUC zirlai zinga tiṭha ber Jeffrey Vanlaltlana, Biotechnology hnenah Dr H Lallungmuana Award an hlan a; Biotechnology-a tiṭha ber hnenah Lenrual Hlui Award, Commerce-a tiṭha ber hnenah Khawtinkhuma Award, Arts-a tiṭha ber hnenah HK Bawichhuaka Award leh Management-a tiṭha ber hnenah A Sawihlira Award an hlan bawk.

PUC aṭangin MZU UG result chhuakah zirlai exam mi 914 zinga 822 (89.93%) an pass a, book prize winner (subject topper) mi 16 leh rank holder (subject hrang hranga top 10-a lang) mi 152 an nei. PUC-ah hian UG course 23 leh post graduate course pangaah zirlai 3,227 an awm mek a ni.

Zirlai lawmna leh chawimawinaah hian khualzahawm Prof. Dibakar Chandra Deka, MZU vice chancellor leh PUC principal Prof. H Lalthanzara te pawhin thu an sawi a ni.