CM-in ruihhloa fihlîm turin zirlaite chah

Hrangbana College (HBC) chuan nimin khan an college Golden Hall-ah Freshers' Social & Felicitation an hmang a, chief minister Zoramthanga'n hmanpuiin, kawng dik leh ṭha an zawh theih nan zu leh ruihhloa fihlîm turin zirlaite a chah.

Chief Minister chuan, HBC chu college chhuanawm tak a nih thu sawiin, zirlaite chuan nun bul an ṭan mek a, hmabak thui tak an la nei tih a sawi a, "Kan hma lamah malsawmna dawn theihna leh anchhia dawn theihna a awm a, zu leh ruihhlo laka kan fihlim lo a nih chuan anchhia, mimal, chhungkua leh khawtlang tana pawi leh ṭha lo em em kawngah kan lut dawn tihna a ni," a ti.

Duhthlanna dik neih leh duhthlanna hlen turin tumruhna neih a pawimawh thu sawiin Zoramthanga chuan, "Mahni inhnehtute hi hnehtu dik tak an ni a, tumruhna hmangin hnehtu dik chu kan ni thei vek," a ti a; tumruh taka nun kawng thianghlim zawh tur leh an hmaa zir tur awm apiangte hmachhawn turin zirlaite a chah.

HBC principal Dr H Lalzidinga chuan, kuminah zirlai lut thar 560 an neih thu sawiin, an zingah Tripura, Assam leh Manipur aṭangin zirlai 12 an tel thu a sawi.

Inkhawmah hian Mizoram University under graduate final semester exam-a ti ṭhate hnenah R Zatlaia Award, Hrangbana Awards, Dr Suprakash Maiti Award leh Merit Award-te an hlan a ni.