Kan sorkar chuan kuhva rah tawlh rûk kan tihtàwp nghal dawn - MLA Lalrindika

MLA Lalrindika Ralte chuan Congress party manifesto pakhat, 'Ṭang puihna' chu Mizorama kut hnathawktute tan a ṭangkai hle dawn thu leh Congress an sorkar chuan dan loa kuhva rah tawlh rûk an tihtàwp nghal dawn thu a sawi.

Lalrindika Ralte hian a bial chhunga Kananthar leh Sihṭhiang khuate a tlawhnaah thu sawiin, Hachhek bial mipui buaina ber chu dan loa ram dang kuhva rah tawlh rûk vanga kuhva thar hralhnaa harsatna a nih thu a sawi a, "Congress party hi sorkar ṭha siam theia min húng chhuak a nih chuan Mizorama kuhva rah ro rawn kal tlang ṭhin hi kan ti tàwp nghal ang," a ti.

Ṭang puihna chu Hachhek bial leh Mizorama kut hnathawktute tan a ṭangkai dawn hle nia sawiin Lalrindika chuan, "Congress party-in kan ti ang kan tih chu kan ti leh ngei dawn. Theihtawp chhuahin kan ṭang ang a, kan eikhawp bakah ṭang tak takte phei chu hlawhtling takin in ding chhuak ang tih ka tiam ngam che u a ni," a ti bawk.