KHAWTHLIR
Hnam dang thiin chhar
July 20, Ningani tlai dar 3:30 vel khan Thingfal leh Thingkah inkar national highway kawngpui thlangah Abdul Admed (27), Jarua, Karimganj, Assam ruang chhar a ni a, a thihnaa inhnamhnawiha puh mi pathumte police-in July 20 vêk khan an man. Thu dawn danin, Abdul Ahmed hi Samar Dutta (28), Lawngtlai Chandmary-a khawsa mek nen an inhnial a, kut an inthlakna lamah Abdul Ahmed chu a thi a, kawng thlangah an nem thla a ni. Samar Dutta leh mi dang pathum, hnam dang vekte chu police-in an man a, thu zawhfiah atan an la kawl mek a ni.
KMMTTP 2025-ah hawn beisei
Sorkar laipuia DoNER Minister leh Commerce & Industry Minister-te chuan Parliament session kal mekah nimin khan Rajya Sabha MP K Vanlalvena zawhna ziakin an chháng a, Kaladan Multi Modal Transit Transport Project chu July 2025-ah hawn beisei a nih thu an tarlang. DoNER Minister leh Commerce & Industry Minister-te chuan, Bangladesh nena insumdawn tawnna tur Kawrpuichhuah Border Trade Centre dinna tur detailed project report (DPR) chu Bangladesh sorkarin a tih tur a peih hunah zawh a nih tur thu an tarlang a; Sangau leh Saisihchhuah inkar kawng laih tura tih tawh, hna thawk loa sût leh tak chu ngaihtuah ṭhat leh a nih tur thu an tarlang bawk.
Congress party-in kawngzawh thulh
MPCC chuan, NGO Coordination Committee-in 'Zo hnahthlak unaute thlavâng hauhna kawngzawh' July 25, 2023-a huaihawt an tum chu an thlâwp thu tarlangin, kawngzawhah a tam thei ang ber tel turin an party mite an chah. Manipur buaina vanga Congress party-in July 27, 2023-a kawngzawh huaihawt an tum chu Joint NGO-te hmalakna avangin an ṭhulh thu an puang bawk.
Consumer puitu
Deputy chief minister Tawnluia chuan nimin khan Administrative Training Institute auditorium-ah mipui (consumer)-te puitu leh an dikna chanvo humhimna tura ruahman web portal - consumerchhantu.mizoram.gov.in leh mobile application 'Chhantu' a tlangzarh. Minister K Lalrinliana'n Consumer Chhantu tih lehkhabu tê leh toll free helpline - 18008890851 a tlangzarh bawk.
Ráltlân sawiho
Aizawl District Committee on Internally Displaced Persons from Manipur chu an chairman Dr Lalhriatzuali Ralte, DC kaihhruaiin nimin khan DC conference hall-ah an ṭhu a, Manipur ráltlânte dawnsawnna dan an sawiho. Chhawmdawlna pek dan tur an rèlte chu Mizoram sorkara thlen an rêl.
Tanpuina hlân
Chaltlang Higher Secondary School first batch (1996-98) Silver Jubilee Organising Committee chuan sum an thawh khawm aṭangin ráltlânte ṭanpuina atan nimin khan Central YMA hnenah Rs 20,000 an hlân a, sikul naupang harsate puih nan Rs 30,000 an hlân bawk. CYMA president R Lalngheta chuan, raltlante chhawmdawlna turin Aizawla YMA branch aṭangin cheng nuai 57, Aizawl pawn aṭangin nuai 1.5 leh mimal leh pawl dang aṭangin nuai 26 an dawn tawh thu a sawi.
Minister-in tlawh
Minister Lalruatkima chuan a bial Aizawl West-II chhung Kanan Venga SASCI sum hmanga hnathawh turte nimin zing khan a tlawh a, PWD hotute'n an ṭawiawm. Minister-in a tlawh hi RKA Road kawng chhuat siamṭhat dan tur leh Kanan Veng thlànmuala mitthi vuina hmun (hall) leh lirthei hûnna siamna turte a ni.
TRC-in zirlaite thlah
T Romana College (TRC) chuan nimin khan an campus-ah zirlai tharte lawmna leh thlahna, Fresher Social cum Graduation Day an hmang. TRC principal Dr Jennifer Lalbiakdiki'n zirlaite lawmna leh thlahna thuchah a sawi a, zirlai ti ṭhate an chawimawi nghal. TRC hi NAAC 'B' grade a ni a, zirlai 1,464 leh thawktu 51 an awm mek a ni.