Mizorama Meitei ṭhenkhat an haw; Thlamuang taka awm tura chah an ni

Tun hnaia Manipur buaina sosang leh avanga pawl ṭhenkhat hmalakna avangin Mizorama chêng Meitei ṭhenkhat chu an khaw lamah an haw. Mizoram sorkara Home Secretary chuan Meitei-te chu Mizoramah thlamuang taka awm tur leh Mizoram chhuahsan lo turin a ngen a, Central YMA pawhin thlabár lo tur leh thlamuang taka awm turin an chah bawk.

Thu dawn danin, Mizo Students Union (MSU)-in Mizorama awm Meitei-te chhiarpui neih an tum tih thuthang a awm avang leh Peace Accord MNF Returnees Association (PAMRA)-in Meitei-te chu Mizoram chhuahsan turin an chah tih thuthang a awm a; hei vang hian Meitei eng emaw zat chuan Mizoram an chhuahsana sawi a ni.

July 22, Inrinni leh nimin khan Aizawl-Imphal thlawhtheihna ticket a zo vek ve ve a, ni dangah chuan a zo vek ngai lo. Aizawl aṭanga Imphal pan turte chu Lengpui Airport-ah an nihna, hnathawhna/zirnate mumal takin an chhinchhiah ṭhin. Home department hotute chuan, Mizoramah Meitei mi 2,000 chuang hret an awma ngaih a nih thu an sawi.

Vety College an tih mai, College of Vety Sciences & Animal Husbandry aṭanga thu dawn danin, an college-ah Meitei mi thawktu 10 vel leh zirlai 60 chuang hret an awm a, thawktu zinga mi ṭhenkhat chuan Mizoram an chhuahsan tawh a, zirlai zingah erawh chuan exam lai a nih avangin haw an awm lo.

Thu dawn danin, Regional Institute of Paramedical and Nursing Sciences (RIPANS)-ah Meitei zirlai 50-60 vel an awm a, tun thlengin buaina boruak vel vanga haw an la awm lo a; Zoram Medical College-ah pawh Meitei zirlai pariat leh professor pathum an awm a, tunlai boruak vanga haw an awm lo a, haw tum pawh an awm rih lo

a ni.

Mizoram University hotute sawi danin, MZU-a thawk zingah Meitei eng emaw zat an awm a, chu'ng zinga ṭhenkhat chu tun hnai boruak avangin an khaw lamah an haw. Tunlai hi chawlh lai a nih avangin tun hnaia boruak a sosan hmaa haw tawh eng emaw zat an awm bawk.

Home secretary H Lalengmawia chuan July 22, 2023 khan a pisaah All Mizoram Manipuri Association hruaitute a kâwm a; Mizorama awm Meitei-te chu thlamuang taka awm tur leh thu léngvâk vanga Mizoram chhuahsan lo turin a ngen a, Mizoram sorkar ngenna chu an mi leh sate hriattir turin AMMA hruaitute a chah a ni.

Central YMA chuan July 22 khan thuchhuah siamin, "Manipur tualchhung buaina vanga kan unau Zo hnahthlakte'n harsatna an tawh mek tuarpuina lantir nan leh an thlavâng hauhna hun NGO Coordination Committee-in July 25, 2023 (Thawhlehni)-a a buatsaih tur chungchangah, Mizorama Meitei awmte thlabár lo tur leh thlamuang taka awm turin CYMA chuan a ngen a ni," an ti.

CYMA chuan, Manipur khawpui Imphal leh a chhehvela Mizo khawsate leh zirlaite himna tur ngaihtuaha theihtawpa hma la turin Manipur sorkar an ngen nghal bawk.