Hnahlana grape wine siamtute'n hralhna lamah harsatna an tâwk

Hnahlan Grape Grower & Processing Cooperative Society (HGGPCS) Ltd. chuan an grape wine siamte hralh chhuah kawngah harsatna an tâwk. Hetih lai hian, tunlai hian grape tharte grape wine-a siam turin an lei khawm mek.

HGGPCS hruaitute hnen aṭanga Vanglaini thu dawn danin, sorkarin grape hun eng emaw chen wine zawrh a khap avang leh license neia zawrh tura thutlukna a siam avangin nikuma grape wine an siam tawhte la hralh loh eng emaw zat an la nei a ni.

Grape wine zawrh phalna license nei mi 40 vel an awm mek a, chu'ng zingah chuan dawr siam lo eng emaw zat an awm. License nei zingah dawr siam mi pali/panga velin HGGPCS winery an dàwr ṭhin a, anni ringawt chuan grape wine siam tawhte an lei séng lo. A hmaa grape wine an hralh ṭhinnate chu license nei lote an nih avangin grape wine siam sa hralh loh a tam phah a ni.

HGGPCS hian chawlhkar hmasa aṭang khan kumina grape tharte an lei khawm leh ṭan a, grape chíngtute hnen aṭangin kg. khat Rs 60-in an lei a, quintal 168 an lei tawh.

Tun hnaia grape an lei khawm zinga ṭhenkhat chu an um ṭan tawh a, ṭhenkhat erawh cold storage-ah an la dah rih. Grape an um mekte chu November 2023 velah zawrh chhuah theih tura ngaih a ni.