MZP-in Meitei laka lo chêt ve ṭha an ti lo

MZP Gen.Hqrs president Lalnunmawia Pautu chuan, Mizorama awm Meitei-te laka hma lo lak a, chêt ve chiam chu ṭha an tih rih loh thu leh, Manipur-a Zo hnahthlakte'n an duh ber - rorelna hran an ngiat tibuai thei a nih avangin fimkhur taka chêt a ṭul an tih thu a sawi.

MZP hruaitute hian July 22, Inrinni khan Aizawl Press Club-ah thuthar thehdarhtute an kâwm a; zawhna chhangin MZP President chuan, "He laia kan lo chêt dan hian kan unaute'n separate administration (rorelna hran) an ngiat mek a tibuai palh thei a, central lamin eng emaw a rawn tih phah thei a, fimkhur hle a ngai. He laia kut lo inthlak ve hi a ṭul kan ti rih lo a, hei hi hlauh vang leh dâwih vang a ni lo," a ti.

Lalnunmawia Pautu chuan, May 3, 2023 aṭanga Manipur-a buaina chhuak chu a tìr aṭanga tun thlengin MZP-in an ngaihven reng tih sawiin, "A ṭul angin kan che chhuak zel dawn a, Manipur Zo fate kan phatsan dawn lo," a ti a; Vaiphei hmeichhe pahnih, Meitei hoin hmeichhe zahawmna nasa taka an tibawrhbáng chu thinurthlak an tih thu leh, chu'ng hmeichhiate chu Zomi Students Federation leh Vaiphei khawtlang hruaitute kaihhruaina hnuaiah him taka an awm thu a sawi.

Thil awm dan enin, Manipur-a Zo hnahthlakte leh Meitei-te chu thlamuang taka awmho chi an ni tawh loa a lan thu sawiin Lalnunmawia chuan, "Kan unaute'n an duh ber separate administration (rorelna hran) nei tura an beihna hi thupui lian ber a ni reng a, a tàwp thlengin kan thláwp zel dawn a ni," a ti.

MZP President chuan, Meitei lakah buaina an tawh avangin Manipur-a Zo hnahthlak pawl hrang hrang - Hmar Inpui, Kuki Inpi, Zomi leh Mizo People Convention-te an ṭangrual hle tih sawiin, "Kan duh ang diak diakin thil awm lo mah se, buaina vanga Zo fate rilru puthmang kan enin, a thlamuanthlak hleah kan ngai," a ti. Vaiphei hmeichhe pahnih chunga thil thleng râpthlak takin prime minister Narendra Modi a ko chhuak ta tih sawiin, "Manipur-ah boruak muanawm tak leh separate administration a thlen theih nana na zawka hma a lak kan beisei a ni," a ti bawk.

MZP hruaitute hian July thla chawlhkar hnih­na­­ah khan Manipur-a Zo hnahthlakte an tlawh kual a; an khua leh mipui humhim tura rál hmatáwnga awmte rammutna hmun hrang hrang - Saipum, Kangvai, Loklaiphai, C Zalenkot, Sougnu/M Phaimol leh G Songgel-te bakah, buaina chhuah hnua thite hriatrengna Wall of Remembrance an tlawh. Rál hmatáwnga awmte chu pawisa bakah, Mizorama doctor-te'n an thawh khawm damdawi ṭhahnem tak leh Health Minister thawh ORS eng emaw zat an pe a ni.

Lalnunmawia Pautu chuan, Lamka leh khaw hrang hrangte Zo hnahthlakte'n an ram leh mipui chhan nan an vèn reng a ngaih thu sawiin, "Volunteer eng emaw zat awm reng a ngai a, ei leh in thlengin mipuiin an tuar hle tih kan hmu a, an lainatawm tak zet," a ti a; Manipur-a Mizote tan a remchan dan ang anga ṭanpuina pe zel tur leh ṭawngṭaipui zel turin Mizo mipui a ngen a ni.

MZP hruaitute chuan, Manipur-a buaina thleng mekah Mizoram sorkar, political party, kohhran leh páwl hrang hrang leh mipui inpekna chu lawmawm an tih thu an sawi a; hnam tana ṭan rual hun a nih avangin political party-te chu ṭanho a pawimawhzia hre thar turin an ngen bawk.