Sorkar thuneitute nen an inbiak hnuah PAMRA leh MSU-in an thil tum an sût

Mizorama Meitei-te laka thu leh hla nei pawl pahnih - PAMRA leh MSU hruaitute chu Home secretary H Lalengmawia'n a pisaah a kâwm a, tun hnaia press release an tihchhuah chungchang a sawipui a; sawiho hnuah pawl pahnihte chuan Meitei-te laka an thil tih tumte an sût.

H Lalengmawia chuan an inkohkhawm chhan a sawifiah bakah, Manipur tualchhung buaina kaihhnawiha Mizoram sorkar hmalaknate a sawi a; Peace Accord MNF Returnees Association (PAMRA) pawhin press release an siam chhan leh an thil tumte an sawifiah.

PAMRA hruaitute chuan, July 21, 2023-a press release an siamah, Mizorama Meitei-te an sahimna atan Mizoram aṭanga inthiar filhlîm tura an tih chungchangah, Meitei-te tihrálṭitna tur leh Mizoram aṭanga hnawhchhuah lam emaw a kâwk lo niin a sawi. Sorkar ngenna vang leh Mizo mipui tana ṭha zawk tur a nih dawn chuan bawhzui zel loh an remti a ni.

Home Secretary pisaah vek hian H Lalengmawia kaihhruaiin PAMRA hruaitute leh All Mizoram Manipuri Association hruaitute an inkâwm nghal bawk.

Home secretary H Laleng­mawia chuan July 22 tlai dar 6 khan a pisaah Mizo Students’ Union (MSU) hruaitute a kâwm a, Mizorama Meitei chung­changa hriat duh an neihte a sawipui a; Manipur tualchhung buaina kaihhnawiha Mizoram sorkar hmalak dan leh Manipur ráltlânte chhawmdawl dante a hrilhfiah.

Sorkar thuchhuah tarlan danin, MSU hruaitute chuan Mizorama Meitei awmte chung­changa hriat duh an neihte hre tura hmalak an tumna chu Meitei-te tihthlabâra hnawh­chhuah tumna a ni lo a, an him zawkna tur niin an sawi.

MSU-in Mizorama Meitei chhiarpui neih an tumnaah, an hriat duhte Mizoram sorkarin a hrilh theih dawn avang leh sorkar hotute'n an thil tum chu kaltlangpui lo tura an ngen avangin bawhzui zel loh MSU chuan an remti a ni.