Bru-te Mizoram E.Roll aṭanga paih kim hi méllung pawimawh a ni - MNYF

Mizo National Youth Front (MNYF) hruaitute chuan, Mizoram aṭanga tlânchhia Bru, Tripura-a awmte chu Mizoram Electoral Roll aṭangin pek vek an ni tawh tih sawiin, "Chief minister Pu Zoramthanga leh NGO Coordination Committee thawhrimna leh ṭanrualna rah duhawm tak hi Mizoram tan méllung pawimawh a ni," an ti.

MNYF hruaitute hian July 22, Inrinni khan Aizawl Press Club-ah thuthar thehdarhtute an kâwm a; an vice president Zodinpuia chuan, Bru vanga Mizoramin kum 24 chhung harsatna a tawh chinfel a nih theihna tura CM Zoramthanga leh a kaihhruai MNF sorkar hmalakna te, NGO Coordination Committee hmalaknate an chhuan thu a sawi.

Zodinpuia sawi danin, Mizoram Electoral Roll-a awm ṭhin Bru voter 11,997 chu paih vek an ni tawh a; chu'ngte chu Mamit district-a vote nei mi 9,130, Kolasib district vote nei mi 1,979 leh Lunglei district-a voter 888 an ni.

October 21, 1997-ah Mizo tlangval pakhat Bru kut tuara a thih avangin Mizorama Bru eng emaw zat chu Tripura-ah an tlanchhia a, Tripura-a relief camp parukah an awm a ni. November 13, 2009-ah Zarzokima, Bungṭhuam, Mamit district chu Bru kut tuara a thih avangin Bru mi tam tak Tripura-ah an tlanchhe leh bawk.

MNYF Vice President chuan, December 15, 2018-a MNF sorkar lak luh a nih aṭangin Tripura-a khawsa Bru chungchang chinfel tumin nasa taka hmalak nghal a nih thu sawiin, "November 8, 2019-a Council of Minister meeting chuan, 'Kum 2019, November ni 30 thlenga Mizorama rawn lêt duh lo Tuikuk (Bru)-te Mizoramah hruai kîr an ni tawh lo ang' tih thu an lo pass tawh a ni," a ti.

Zodinpuia chuan, "January 16, 2020 khan CM Zoramthanga hmalakna leh tlawmngai pawlte ṭanrualna avangin Tripura-a khawsa Tuikukte chu Union Home minister Amit Shah kaihhruaina hnuaiah mi 30,000 chuang zet Tripura-a awm nghet turin New Delhi-ah inremna thuthlung ziahpui an ni," a ti a; thuthlungah chuan, November 30, 2019 hnu lama Tripura relief camp-a Bru awmte chu an duhthlannain Tripura-a an chen hlen remtih a nih thu tarlan a ni tih a sawi bawk.