Thla 1 chhungin Champhai district-ah ruihhlo Rs 5,22,26,648 hû man a ni

Champhai District Narco Coordination Centre (NCORD) Committee chu July 21, 2023 khan an chairman James Lalrinchhana, bawrhsap hoin DC conference hall-ah an ṭhukhawm a; thla khat chhungin Champhai district-ah ruihhlo cheng nuai 522 chuang hû man a nih thu tarlan a ni.

Ṭhutkhawma tarlan danin, June 22, 2023 aṭanga July 21, 2023 chhung khan Police, Excise & Narcotics department leh Assam Rifles-te'n Champhai district-ah ruihhlo chi hrang hrang Rs 5,22,26,648 hû an man a; ruihhlo kaihhnawihah mi 36 lakah thubuai 27 ziah luh a ni a, ruihhlo vanga man mi 36 zinga pahnih chu ram dang mi an ni.

Kuminah Janury 1 - July 12 inkar khan Champhai disrtict-ah Narcotic Drugs and Psychotropic Substances Act, 1985 (NDPS Act) hnuaiah mi 73 thubuai siamsak an ni tawh a, mipa 63 leh hmeichhia 10 an ni. Mi man 73 zingah ram pawn mi (foreigner) leh state dang mi 10 ve ve an awm tel.

Champhai Police-te chuan June 22 - July 21, 2023 chhungin NDPS Act hnuaiah thubuai 15 an ziak lut a, chumi kaihhnawihah chuan mi 24 manin, ram dang mi pahnih an tel. Police hian heroin gram 5,006, tualchhung rate-a Rs 1,12,08,000 hû leh methamphetamine mûm 2,02,000 (kg 22.641), tualchhung rate-a Rs 40,400,000 hû an man a ni.

Champhai END pawhin thla khat chhung vekin NDPS Act hnuaiah thubuai 12 ziak lutin, mi 12 an man a, Mizo vek an ni. Heroin gram 516, tualchhung rate-a Rs 6,18,648 hû an man. Hemi hun chhung vek hian Assam Rifles-in heroin gram 409.42 leh methamphetamine mûm 20,000 an man bawk.

Ṭhutkhawmah hian sorkar laipuia Ministry of Finance, Department of Revenue hnuaia Competent Authority & Administrator, Smugglers and Foreign Exchange Manipulators (Forfeiture of Property) Act, 1976 & NDPS Act, 1985, Kolkata-a inbun kaltlangin ruihhlo tawlhtu mante jail-a tàntir leh pawisa chawitir bakah, an bank account hrènsak te, an in leh lo thlenga man theihna dan kalpui a nih thu tarlan a ni.

NDPS Act angin, ruihhlo tawlhrûk lian thama inhnamhnawihte lakah financial investigation kalpui ṭan a ni tawh. NDPS Act hnuaia thubuai neite'n an phu tâwk hremna an hmuh theih nan ṭanrual a pawimawh thu leh thuhretu neih ṭhat a ṭul thute an sawi bawk.