Police-in zirna-in pali an véng

Aizawla Meitei awmte himna atan Mizoram Police chuan hma an la a, DIG (Northern Range) Lallianmawia chuan July 21, 2023 tlai khan 1st MAP, 3rd MAP leh 5th IR commandant-te hnenah lehkha thawnin, Aizawl leh a chhehvela zirna-in ṭhenkhat, Meitei awmnaah vengtu police silai keng dah turin a hriattir.

DIG (NR) hriattirna ang chuan, Vety College, Selesihah 1st MAP section khat, Mizoram University campus-ah 3rd MAP section khat, RIPANS-ah 5th IR section khat leh, Zoram Medical College-ah 1st MAP mi pathum awm tura tih a ni a; police section khatah hian mi 10 vel an awm. Hriattirna tihchhuah angin zirna-in pali-ah hian July 21 zan tìr lamah police dah nghal a ni.