Politics bawlhhlawh tak kohhran huanga seng luh an tum - J Sawma

MNF Publicity Board vice chairman J Malsawmzuala Vanchhawng chuan, politics bawlhhlawh tak kohhran huanga ngampa taka seng luh tum an awm thu leh kohhran inlungrualna chawk buai zawnga politics khel an awm a nih chuan Pathian pawisawina a nih a rin thu a sawi.

J Malsawmzuala Vanchhawng hian July 22, Inrinni khan Ramhlun Venglai MNF Unit-II political training-ah thu sawiin, politics chu mimal, chhungkua, khawtlang, ram leh sakhuana nghawngtu a nih thu a sawi a, "Kohhran hruaitu ṭhenkhat ṭhahnemngaihna awte thiam taka tipunlun a, mipui rilrua huatna tuhna hmanruaa hmang ṭhin an awm niin a lang. Politics bawlhhlawh tak kohhran huanga ngampa taka seng luh an tum ta zel niin a lang a, kohhran hote inlungrualna chawk buai zawnga politics khel kan awm a nih chuan Pathian pawi sawina a ni ang," a ti.