Congress tih loh zawng chu BJP thurualpui thei àwm vek - MPCC Treasurer

MPCC treasurer Dr Lalmalsawma Nghaka chuan, Mizorama political party, Congress party tih loh zawng chu BJP thurualpui thei àwm an nih vek thu leh, Congress erawh chu BJP nen an inthurual thei ngai dawn loh thu a sawi.

Dr Lalmalsawma Nghaka hian July 22, Inrinni khan Salem Veng Congress Unit I-a lawm luh inkhawmah thu sawiin, "Mizoramah Congress tih loh chu BJP thurualpui thei àwm an nih vek. Congress chu BJP nen ngaihdan inang lo, duh dan inang lo kan nih avangin engti kawng mahin kan inthurual thei dawn lo," a ti.

India chu ṭhuang hnih - BJP leh Congress angin a kal nia sawiin, Congress chu sakhaw zalenna duhtute leh BJP lama ṭangte chu Uniform Civil Code barh luih tumtu an nih thu a sawi a, "UCC hi hmarchhakah kan hmang lo ang pawh an ti mai thei, thlamuanna tur a ni lo," tiin, India hmun hrang hranga Mizote leh Kristiante tan a pawi theih thu a sawi.

MPCC Treasurer chuan, "Vawiin thlengin BJP la thawhpui tlat, BJP sum leh pai hmanga an thâ tihchak tum an la awm tlat a, tute nge an nih pawh sawifiah a ngai lo," a ti.