KHAWTHLIR

Sportspersons rally

Assam Rifles chuan July 22, Inrinni aṭang khan Serchhipa AR battalion headquarters-ah 'Assam Rifles Meritorious Sportspersons Rally 2023' atan online registration tihna hun an buatsaih ṭan a, July 30, 2023 thleng a awh ang. AR Meritorious Sportspersons Rally hi recruitment rally awm leh tur puala AR leh MJA, Serchhip district-te hmalakna a ni.

Harsatna enfiah

Minister Lalruatkima chuan July 22, Inrinni khan a bial chhung Vaivakawna leimin vanga chhungkaw 20 vel harsatna tawh a enfiah. Sorkara thuneitu dangte leh Vaivakawn Local Council leh YMA hruaitute nen hmalak dan tur an sawiho a; thutlukna siam nghal a harsat avangin PWD (Highways) hotute nen a rang thei ang bera thuṭkhawma ruahmanna siam turin an dah.

Thalai talk show

Mizoram College of Nursing, Falkawnah July 21, 2023 khan National Implementation Committee chuan 'Swasth Tan Swasth Man' campaign pualin tleirawl leh ṭhalai pualin talk show a buatsaih a, rilru lam hriselna chungchang sawiho a ni. Rilru lam hriselna kaihhnawihah Tele MANAS helpline number 14416 chu engtik lai pawha biak theih a nih thu an tarlan.

Achiever's Nite

Cricket Association of Mizoram chuan July 21, 2023 zan khan Aijal Club-ah 2nd North East Cricket Development Committee Achiever's Nite an hmang a, chief minister Zoramthanga'n hmanpuiin, "Keini'n hma kan sawn hian India kan timawi zual tihna a ni a, sang takah kan awm ve thei a ni tih hre reng ang u," a ti. Achiever's Nite-ah hian hmarchhak state-a under 15, 16, 19 leh 25 huanga mipa leh hmeichhia player ṭhate hnenah chawimawina hlan a ni.

Inthlan tur thlirho

Lunglei leh Siahaa District Media Certification & Monitoring Committee chu an District Election Officer/Bawrhsapte kaihhruaiin July 21, 2023 khan an ṭhukhawm a, kumina MLA inthlanpui lo awm tura inpuahchahna pakhat atan inthlan kaihhnawih thil chanchinbu leh TV kaltlanga fakna (advertisement) chhuah man (rate) sawiho a ni.

Meizial man

Assam Rifles sipaite chuan July 22, Inrinni khan Chhungte, Champhai district-ah ram dang meizial báwmpui (case) 26 an man a, Champhaia Customs hnenah an hlan. Foreign cigarette an man hi Rs 33,80,000 hû a ni.

Damdawi-in tanpui

Vanlalsailova chuan July 22, Inrinni khan West Phaileng damdawi-in (primary health centre) hnenah Rs 75,000 man YK Solar a hlan a, Dampa bial aṭanga MLA atan thlan tlin a nih chuan West Phaileng PHC tan a theih ang tâwka hmalak zui zel a tum thu a sawi.