Imphal aṭangin mi 40 vel rawn haw; Zirlai awmte'n harsatna an tâwk lo
Manipur buainaa tun hnaia boruak sosang leh avangin Manipur khawpui Imphal aṭangin Mizo 40 vel an rawn haw a, zirlai awm mekte'n harsatna an tâwk lo. Hetih lai hian, tun hnai bikah Mizorama Meitei awm zinga mi 500 velin Mizoram an chhuahsan tawh.
Vanglaini palai zawhna chhangin, All Mizo Medical Students Union (AMMSU) president Immanuel Lalngaihmanawma chuan, Imphal-a Mizo zirlai ṭhenkhat chu hlauhthâwn thilah Mizoramah an haw thu a sawi a, "Ṭhenkhat chu anmahni hlauhthawn ai mahin, an chhungte hlauthâwngin an rawn chah haw a ni mah zawk," a ti.
AMMSU President sawi danin, Imphal aṭangin tun hnai têah mi 40 vel Mizoram panin an rawn haw a, chu'ng zinga ṭhenkhat chu post graduate ti zo tawh, an haw hun tawh hrim hrimte an ni.
Mizo zirlaite'n harsatna an tawh loh thu sawiin Immanuela chuan, "Tun dinhmunah chuan buaina kan nei lo. Mizoram lama thâwm a'n awm deuh khan kan han hlauthâwng deuh a, mahse, harsatna kan nei lo e. Ṭul thilah chuan khawlaiah kan chhuak fo a, buaina kan tâwk ngai lo," a ti.
AMMSU-ah hian member 100 chuang hret an awm thu sawiin AMMSU President chuan, "M.Phil. leh clinical psychologist rawn tite pawh an awm nual a, kan member ni chiah lo mahse kan inpumkhat vek," a ti a; tun dinhmunah chuan Mizoram lama haw tum an awm tawh rih loa an inhriat thu a sawi.
Hetih lai hian, tun hnaiah Mizorama Meitei awm zinga mi 500 velin Mizoram an chhuahsan thu Mizoram Police hotute'n an sawi a, "Meitei hawte hi Joint NGO huaihawta kawngzawh tur vang a ni ber a, MSU leh PAMRA hmalakna vanga haw an ni chiah lo," an ti.
Police aṭanga thu dawn danin, Mizoramah Meite mi 1,500 vel an awm a; Mizoram aṭanga haw zinga a tam zawk chu PAMRA leh MSU hmalak tumna vanga haw ni loin, chawlh hmang tur leh an khaw lama an chhungte ngaihtuah vanga haw an ni.