Kawng chhia vangin maxicab an châwl

Lunglei aṭanga khawthlang lama maxicab tlan ṭhinte chuan kawng chhe lutuk avangin nimin aṭang khan tiamchin awm loin maxicab total bandh an kalpui a, mipui phur turin an tlân lo.

Lunglei aṭanga khawthlang lam panna kawngpui, NH-302 chhe lutuk chungchangah hian Lunglei Khawthlang Joint Maxicab Services hruaitute chu July 22, 2023 khan Chhûmkhûmah an ṭhukhawm a; an tlanna ber kawngpui a chhiat em avang leh chêtsual a hlauhawm em avangin mipui him zawk nan leh kawng siama hnathawh a chak zawk theih nan July 24 aṭangin tiam chin awm loa tlan loh an rêl a ni.

Maxicab enkawltute chuan, an tlan loh chhungin kawng siamtu contractor/company hmalakna ngaihvenin an thithlai reng dawn tih an tarlang a, "Hma an lak chak zawk theih nan nasa zawka hmalak zel kan tum," an ti. Lunglei thlang lama cheng mipui hriatthiamna an ngen bawk.

Kawng chhia chungchang hi nimin khan Lunglei DC Ramdinliani hoin a pisaah sawiho a ni a; NH kawngpui enkawltu NHIDCL leh an hnuaia contractor BRN Infrastructure hotute leh Transport department leh Police aiawhte an tel.

Ṭhutkhawmah hian, NHIDCL leh contractor BRN Infrastructure-te chu maxicab tlan loh chhungin thawktute leh hmanruate la khawm a, July 26-28, 2023 chhunga kawng siam hna ngawrh taka thawk tura hriattir an ni a; damlo phur leh ṭul bik thil tih loh chu lirthei, a bikin lirthei liante tlân lo turin an chah bawk.