Manipur-a Zo hnahthlakte pualin vawiinah kawngzawh a ni dawn

YMA, MHIP, MUP, MZP leh MSU telna NGO Coordination Committee huaihawtin vawiin hian Aizawl leh khaw hrang hrangah 'Zo hnahthlak unaute thlavâng hauhna kawngzawh' neih a ni dawn a, Aizawlah chuan chawhma dar 11-ah Kulikawn leh Chanmari kâwnah ṭan a ni ang. Kawngzawhah hian tel vek turin mipui sàwm an ni.

Kawngzawh hi Kulikawn leh Chanmari kâwnah chawhma dar 11-ah ṭan tur a ni a, kawng zawh ṭan hmain inkhawm buatsaih tur niin, thusawi a awm dawn. Central YMA chuan Aizawla YMA branch-te kawng zawh ṭanna tur a ruahman a, Kulikawn aṭangin YMA branch 40 leh Chanmari kawn aṭangin branch 68-in kawng an zawh ang. Kawng zawhtute'n Raj Bhavan hmar lam gate bul kawngpui an pan dawn a, intawhkhawmnaah inkhawm buatsaih leh a ni ang.

Aizawl bakah district khawpui leh khaw dang hrang hrangahte pawh kawngzawh huaihawt tur a ni.

Kawngzawh tur avang hian Traffic SP Stephen Lalrinawma chuan chawhma dar 10 aṭanga kawngzawh hun hman zawh hma thlenga Aizawla lirthei tlân dan tur leh lirthei dahna hmun turte a tarlang. Chanmari kâwn, Kulikawn leh Raj Bhavan hmar lam gate bulah mipui an punkhawm dawn avangin lirthei dah phal a ni lo a; Kulikawn leh Chanmari inkara lirtheia tlan chhuak turte chu inhmakhua tur leh kawng danga tlan tura thuràwn an ni.

Political party hrang hrangte chuan kawngzawh tur chu an thlàwp thu leh an party pisate an khâr phah dawn thu an puang a; kawngzawhah tel vek turin an party mite an chah.

Aizawl City Bus Owners Association pawhin kawngzawh tur an thlàwp thu an puang a; kawngzawh hun hman chhungin Ngaizel-Zemabawk inkara tlan city bus-te chu chawlh tur a ni a, kawngzawh hun hman zawh hnuah tlan ṭan leh theih a nih thu leh, hmun (route) pènhleha tlânte tan erawh chuan tlan reng theih a nih thu an tarlang.