DGP Anil Shukla leh MJA an inkâwm; Meitei haw duhte police-in venhimna an pe

Mizoram Director General of Police (DGP) thar Anil Shukla, IPS chuan nimin khan a pisaah MJA Gen. Hqrs hruaitute kâwmin thingpui a inpui a; Mizorama awm Meitei, an khaw lama haw duhte chu police-in venhimna an pek thu leh, vawiina NGO Coordination Committee huaihawta kawngzawh tur chu muanawm taka neih a nih a beisei thu a sawi.

DGP Anil Shukla leh MJA hruaitute hian Mizorama venhimna lama police-te hna­thawh mek dante leh hmachhawp hrang hrang an sawiho a; DGP chuan MJA/journalist-te nen thawhhona ṭha tak neih a duh thu sawiin, thawhhopuiah a sáwm.

Zawhna chhangin DGP chuan, NGO Coordination Committee huaihawta Mizoram hmun hrang hranga Manipur-a Zo hnahthlakte thlavang hauhna kawng­zawh huaihawt tur chu muanawm taka kalpui a nih a beisei thu a sawi a, "Police-te venhimna lam thawk turin kan inbuatsaih a, police tam tawk tak duty kan indah dawn," a ti.

Anil Shukla chuan, Mizorama Meitei awmte tan venhimna an pek thu leh Meitei zirlai awmna zirna-inahte police an indah thu a sawi a, "Manipur mite tan venhimna mumal takin kan pe a, an awm dan turte kan sawipui. Mizoram aṭanga haw duhte chu a ṭul angin police-in kan veng ṭhin," a ti.

Aizawlah chauh ni loin district dangahte pawh venhimna an ruahman thu te, zan lamah pawh venhimna an pek thu te, Manipur leh Assam DGP-te nen pawh Manipur buaina chungchangah an inbiak reng thu DGP chuan a sawi.

Mizoram DGP chuan, Mizoram Police-ah police thawk mek mi 8,100 chuang hret an awm a, chutih laiin, post awm zat chu 12,000 chuang a nih thu a sawi bawk.

DGP Anil Shukla nena inkawmnaah hian MJA-te hi an president C Lalrambuatsaiha hoin an tel a ni.