Forest Conservation (Amendment) Bill dodal turin Lalduhoma'n mipui a sáwm

ZPM leader Lalduhoma chuan, sorkar laipuiin Forest Conservation (Amendment) Bill, 2023 a buaipui mek chu hmarchhak state panga tan chuan 'Bill sakei' a nih thu a sawi a; theihtawp chhuaha dodalpuiah leh BJP kaihhruai sorkar paihthla tura ṭanrualpuiah Mizoram sorkar, MP-te leh mipui a sáwm.

Lalduhoma hian nimin khan press statement siamin, Forest Conservation (Amendment) Bill, 2023 chungchang a tarlang. A tarlan danin, Forest (Conservation) Act, 1980-in hmarchhak state panga - Manipur, Nagaland, Tripura, Meghalaya leh Mizorama ramngawte a humhalh ṭha hle a; dan chu tidanglam turin Forest Conservation (Amendment) Bill, 2023 siam a ni.

Bill chu hmarchhak state panga tan chuan 'Bill sakei' a tling tih sawiin Lalduhoma chuan, "Bill hi international boundary aṭanga boruak méla teha km. 100 huam chhunga hman tur a ni a, Mizoram chu a pumpuiin min huap deuhthaw dawn. Km. 100 bial huam chinah FCA 1980 hmangin ramngaw kan humhalh thei dawn tawh lo a, Central sorkarin ram venhimna leh vantlang mamawh atan a duhna lai laiah hmunhma a rawn khuar thei tawh dawn a... inchîmralna hmanraw ṭangkai tak a ni dawn," a ti.

Lalduhoma chuan, dan siamṭhat chu pawm a nih chuan sorkar laipuiin ram venhimna, hmasawnna hna thawh leh chhuanlam dang hmanga hmarchhak state pangaah bû an rawn khuar dawnah forest clearance lak hmasak a ngai tawh dawn lo tih sawiin, "Awlsam takin kan ram chu an suasam thei dawn a ni," a ti a; a nghawng ṭha lo tur hrang hrang a tarlang bawk.

ZPM Leader tarlan danin, Forest Conservation (Amendment) Bill, 2023 chu sorkar laipuia EFCC minister Bhupender Yadav-a'n March 29, 2023 khan Lok Sabha-ah a pu lût a, Joint Parliamentary Committee (JPC) zir chian tura dah nghal a ni. JPC-ah chuan MP 31 telin, ruling party member-te'n an tam hneh.

JPC chuan state ṭhenkhat leh vantlang aṭangin sawi duhte sawina hun ni 15 a hawng a, vantlang aṭangin sawiselna leh tidanglam tura rawtna 1,309 a lut tih sawiin Lalduhoma chuan, "Mizoram sorkar hian EFCC Ministry leh JPC-ah hian ngaihdan an thehlut ve ngeiin a rinawm a, Guwahati meeting-ah pawh an kal ve ngeia hriat a ni," a ti.

Lalduhoma tarlan danin, Bill chuan Preamble a nei thar a, Forest (Conservation) Act tih ṭhin chu 'Van (Sanrakshan Evam Samvardhan) Adhiniyan' tia thlak a ni dawn a; Forest Conservation Act, 1980-in ramngaw a humhalhna ber Section-2 chu tidanglamin, section thar pahnih (1A leh 3C) belh a ni.

JPC chu July 11, 2023 khan ṭhuin, tihdanglam awm loin Bill chu an pawm a, July 20 khan Lok Sabha leh Rajya Sabha-ah report an thehlut a, Parliament session neih mekah pawm tum a ni.

ZPM Leader chuan, July 18, 2023-a Bengaluru-a eptu party 26 kalkhawmin Indian National Democratic Inclusive Alliance (INDIA) an din tharah Congress (INC)-in PM chuh an tum loh thu an sawi tih a sawi a, "Mite hlauhthawn ber leadership-a buaina chu a awm dawn lo a, a lawmawm hle. INDIA hian vote vbc. 65 vel a nei a, kan ṭanrual phawt chuan BJP hi kan paihthla thei tih hriain theihtawp i chhuah tlang ang u," a ti.