NDA hi kan hlau lo - Zoramthanga

MNF president Zoramthanga, chief minister chuan, MNF chu Mizo ram, hnam leh sakhua humhim tura ding a nih avangin National Democratic Alliance (NDA) an hlauh loh thu leh NDA kalkhawmah MNF anga do huai ngam an awm loh thu a sawi.

Nimina Mizo Hnam Runa inkhawmah Zoramthanga chuan, "NDA kalkhawmah keini anga do huai tu mah an awm lo. Modi-a an intlawn siak luih luih a ni mai. MNF chu a policy-in Mizoram hnam leh a sakhaw humhim tura ding kan nih angin NDA hi kan hlau lo. MNF hi central sorkar a inthlak avangin kan dinna kan la thlak ve ngai lo," a ti.

India ram politics chu NDA (BJP leh a kaihhnawih) leh UPA (Congress leh a kaihhnawih)-in a kal ṭhin a, UPA chu tun hnaia I.N.D.I.A tia thlak a nih thu sawiin Zoramthanga chuan, "Keini chu NDA group-ah tel mah ila, policy leh thiltumah chuan NDA thuin kan kal lo. Kan policy 'Pathian leh kan ram tan' tih kalha thil a kal chuan kan dodal mai," a ti a; an tan NDA, UPA, I.N.D.I.A-in awmzia a nei lo niin a sawi.

MNF President chuan, mi ṭhenkhatin MNF-in BJP an hlau angin an sawi nia sawiin, "Kan hlau awkawng lo. Burma ráltlân push back (nawr kîr) tur an ti a, keini chuan kan nawr kîr dawn lo, chaw leh an mamawh kan pe dawn tiin House-ah hial ka puang. Hmasawnna thilah chuan kan thawkho a ni thei, kan hnam leh sakhaw khawih thilah chuan kan thawkho thei lo," a ti.

Uniform Civil Code chungchangah Zoramthanga chuan, "Mizoram Assembly-ah dodal thu kan pass a, Delhi-ah kan theh thla. Tun hnaiah pawh PM hnenah 'In UCC hi kan do tlat dawn' tih ka ziak," a ti a; MNF-in UCC an do tlat dawn thu a sawi.

Zoramthanga chuan, Manipur-a Zo hnahthlak, sahimna zawnga Mizorama rawn lutte chhawmdawlna tur sorkar laipuia an dil chu hmuh a la nih loh thu a sawi a; NGO Coordination Committee-in vawiina kawngzawh huaihawt an tum chungchangah, kawngzawh tur avangin MNF pisa khâr a nih dawn thu sawiin, kawngzawha tel vek turin MNF mi leh sate a chah.

ZPM chungchang sawiin Zorama chuan, an phûr vanglai takin candidate an puang a, an buai ta nuai mai niin a sawi a, "Inthlan a hnai tulh tulh ang a, an buai tulh tulh dawn. Keini chu kum 60 chuang constitution leh nomination committee mumal tak nen kan awm," a ti.

MNF President chuan, "Kan policy hi positive/constructive zawngin kan kalpui a, anni (ZPM) chuan chhe vek policy - MNF leh Congress-in kan ram economy, culture, moral an tichhe vek an ti. Mi dang chu chhe vek chhuahin an chhuah a, a ṭha awm chhun kan tun din a ngai an ti a ni," a ti a; MNF leh Congress sorkar awm tawhte chu chhe vek anga sawiah ZPM a puh. ZPM chu an candidate-te belchianin, an derthâwng tulh tulh niin a sawi bawk.