KMMTTP kawngin an ram a tihchhiatsak ten July 2023 chhunga zangnadawmna pek phût

Kaladan Multi Modal Transit Transport Project (KMMTTP) kawngpui sialin ram a tihchhiatsakte intêlkhawm, Lawngtlai District Land Owners' Association chuan Mizoram Chief Secretary hnenah ultimatum an thehlut a; zangnadawmna an hmuh tur ang July 2023 chhunga an hmuh loh chuan Lawngtlaia District Forest Officer pisa dan an tum thu leh an thiam anga hmalak an tum thu an tarlang.

Lawngtlai District Land Owners' Association (LDLOA) chuan, zangnadawmna an hmuhna tur dâltu ber chu Mizoram sorkara Environment, Forest, & Climate Change depart­ment a nih thu an tarlang. EFCC department-in mimal ram zau tak an chuhpui tih sawiin, Gauhati High Court-in ram neitu dik tak mi 138 hnenah zangnadawmna pek ni se, Mizoram sorkar leh MoRTH-in thutlukna siam rawh se, a tih tawhah hmalakna lawmawm hriat tur tun thlengin a la awm lo tih an tarlang a ni.

LDLOA hian July 2023 chhung ngeiin an ram dik tak hectare 15.24 aṭangin Mizoram EFCC department-in NPV&CA an siam lo emaw, ram neitu mi 138-te'n zangnadawmna an hmuhna turin forest clearence an siam lo emaw a nih chuan August 1, 2023 aṭangin Lawngtlaia EFCC pisa dan an tum a; KMMTTP siam mekah hna thawh chhunzawm an remti dawn lo tih an puang bawk.

KMMTTP zangnadawmna chungchangah hian nimin khan chief minister Zoramthanga hoin sorkar hotute an ṭhukhawm a; KMMTTP hawn thuai a nih theih nan zangnadawmna dawng tur dik takte hnenah pe thuai turin Chief Minister hmingin Ministry of Road Transport & Highways-ah DO letter ziah ni se, MoRTH-in hriat belh duh a neih apiangte a rang lama hrilh zel ni se, an ti.