Aizawlah Youth-20 Meet buatsaih

Sports & Youth Services department leh Mizo Zirlai Pawl (MZP) chuan nimin khan Vanapa Hall-ah 'Youth-20 Meet on Nationalism, Patriotism & Development' an buatsaih a, deputy chief minister Tawnluia leh SYS minister Robert Romawia Royte ten an hmanpui.

Tawnluia chuan, hnam thinlung vanga hnam pasalṭha, ram tana martarte an hre reng tih sawiin, "Ṭhangtharte pawhin martarte ram hmangaihna hre reng se ka duh. He hnam thinlung hi kan ram innghahna a ni tih an hriat zel a, hmasawnna atan a pawimawh thu an hriat zui zel ka duh a ni," a ti.

Robert Romawia Royte chuan, "Article 371(G) hi vawiin thlengin Mizoram tana a pawimawhzia kan la hmu zel. India sorkarin state inrêlbàwlna atana state sorkara thuneihna sang lutuk a pe hi a makin a lawmawm hle a ni," a ti a, MNF-in nationalism rilru pûa Mizoram tana an beihna chu ropui a tih thu a sawi.

Inkhawm hi MZP president Lalnunmawia Pautu-in a kaihruai a; MZP adviser L Ramdinliana Renthlei, Dr Catherine Lalmuanawmi, Social Welfare & Tribal Affairs department aṭangin Lalfakawmi leh ATI faculty Golda Dell Zohmangai ten thupui an sawi a ni.