Hualngohmun kawng chhia siam dawn; Sorkar hmalaknain rei a daih ngai lo

Hualngohmun khawtlang chu an khaw chhunga Aizawl-Lunglei World Bank Road kawng chhe lutuk thawm ṭhain July 29, 2023 (Inrinni) khian an hnatlang dawn a, hnatlan ní hian chawhma dar 10 aṭanga tlai dar 4 inkarah kawngpui an khâr dawn. Sorkar/PWD hmalakna a ṭhat tâwk loh ṭhin avangin siam ni ṭhin mahse rei a daih ngai tih an sawi.

Hnatlangah hian Hualngohmun khuaa chhung tin aṭangin thawh chhuah vek tur niin, thawk chhuak thei lote tan Rs 500 thawh tur a ni a; kawng khuar hnawh mâmna tur lung leina atan sum neih ang ang thawh khawm turin an inchah. An khawchhuak zawng zawngte pawh hnatlangah thawk chhuak ve turin an sáwm a, kawngpui hmang ṭhinte pawh a thei apiang tel turin an sáwm bawk.

Hualngohmun khawtlang hruaitute chuan, an khaw chhunga BN College of Nursing bula kawng chhak lama leimin ṭhinin hun rei tak kawngpui a tichhe tawh a, thawm ṭhatte pawh a ni tawh ṭhin tih an sawi a, "Hmalakna a ṭhat tâwk loh avangin rei a daih ngai lo a, tuna concrete dona pawh a ṭhen lai chu a âwn leh nghal tawh," an ti.

Khawtlang hruaitute chuan, "Lei tawlh dâwmna concrete hi hniam tê a nih avangin ruahsûr hlekin chirh a liam a, viltu leh paih faitu an awm si loh avangin a tlân tlang apiangte an berh vek zel a, two wheeler tlu an awm reng bawk," an ti a; chuvang chuan kawng thawm ṭha turin hnatlang an ko ta tih an sawi. "Tun aia ṭha leh rinawm, mipui a hmutute pawhina rintlak, ngaihṭhat thlak hmalakna hi thleng thuai se kan ti tak zet a ni," an ti bawk.

Hualngohmun khawtlang hruaitute tarlan danin, tuna BN College of Nursing bula kawng chhak lam lei min ṭhin chu kum 2003-a inṭan a ni a, PWD-in hma la tawh ṭhin mahse a daih rei ngai lo. Kum 2007-ah lung fûn hmanga dâwm a nih hnuah kum 2010-ah lung rema dâwm a ni a, kum 2014-ah lung fûna dâwm leh a ni. Kum 2018-ah lung rema dâwm leh a ni a, kumin 2023 hian RCC (concrete) hmangin do leh a ni bawk.